63 snem ka jingïaid lynti ka Sohlait Secondary School, ha ïing trep hap shong ki khynnah bym phai khmat ka sorkar

Nongpoh, Naiwieng 13 : Watla ka pule ka puthi kadei kawei naki thong jong ka sorkar ban kyntiew ïaki khun samla bad ki jaka pule haka jylla, hynrei bun naki jaka pule bad ki skul haki thaiñ nongkyndong ki mad jingeh kaba khraw naka jingshah iehbeiñ ban pyntyllun bad pynphriang ïaka jingnang jingstad sha ki khynnah kum ki nongtbeh jingshai, namar ka jingbym phai khmat jong ka sorkar naduh ki ïing skul (building), ki kamra klas kiba biang, ki nonghikai, bad ki jingdonkam katkum ki kyndon ba ki skul ki dei ban don.
Kawei naki skul kaba la rim ha Ri-Bhoi ka dei ka Sohlait Secondary School, kaba don haka shnong Sohlaitrim kaba don tang kumba 5 km eiei na surok bah National Highway, hynrei katei ka skul ka dei kaba shah ieh khunswet haka sorkar watla kala don kumba 63 snem ka jingïaid lynti naduh bala seng ïaka ha u snem 1954 kaba ki nonghikai bad ki bor pynïaid skul ki mad jingeh kaba khraw ban pynphriang ïaka jingnang ka jingstad sha ki khynnah namar ka jinglong jingman jong ka skul, ki kamra klas, bala isangsot haba nujor ba kiwei ki skul sha ki jaka sor bala hap ban shu syrdep bad ker da ki siej tang ban lait naka sngi u slap.
U nongthoh khubor jong U Mawphor u la ioh ruh ban ïakren bad ki nongïalam shnong bad kumjuh u Headmaster jong katei ka skul kiba la pynpaw bad ïathuh ïaka history jong katei ka skul bala la seng ïaka naduh u snem 1954 haka kyrdan Primary Level bad la shimti noh da ka sorkar hadien, bad ka jingbuddien bad ka jingshimkhia jong ki riew rangbah bad ka Dorbar Shnong ha u snem 2002 la lah ban kyntiew kyrdan noh ïaka sha ka Upper Primary bad pynrung ruh haka skhim SSA ha u snem 2005.
Ka Dorbar Shnong da ka jingkitkhlieh ban wanrah shuh shuh ïaka jingshakri ïaki khynnah khamtam ïa kito ki khynnah kiba wan naki longïing ba duk ba rangli, ki bym don lad ban leit pule shabar shnong kala sdang ban kyntiew bad seng ïaka Secondary School ha u snem 2014 ha ryngkat ka jingïatreilang bad ki nonghikai kiba la hikai lypa ha katei ka skul naka LP bad UP lem bad ki nongshet kiba kum ka shnong ka hap ban bei pisa hi nalade naka bynta ka tulop jong ki haka jingsiew kaba rit.
Kumba long haduh mynta katei ka skul kala nang kiew shaphrang haka jingdon ki khynnah (Enrolment) man u snem, bad ki don ruh 2 ngut ki nonghikai sorkar, 4 ngut ki nonghikai SSA bad 2 ngut ki dei kiba bei bad siew tulop hi da ka shnong, bad namar ka jingduna ki nonghikai wat ki nongshet ki hap ban ïarap lang ïaki nonghikai ban hikai ha katei ka skul.
Hynrei kaba sngewsih ka long ba haduh mynta katei ka skul kam don satia ki ïing skul (building) bad ki kamra klas kiba biang kiba lah ban kyrshan katkum ka jingdon jong ki khynnah pule, kumta naka liang ka shnong kala hap ban shu shna da ka ïing trep kaba hap ban maramot man la u snem tang ban kyrshan ïaki khynnah ba duk jong katei ka thaiñ ki bym kot bor ban leit pule shabar jong ka shnong bad kiwei ki jaka.
Naka liang ki bor shnong bad ki nonghikai kila kyrpad ruh sha ka sorkar ba kam dei ban phai khmat tang ïaki skul ba don haki jaka sor katba bun naki khynnah nongkyndong ki shah ieh beiñ watla ki nonghikai ki trei shitom ban wanrah ïaka jingnang jingstad, hynrei kumba ka sorkar ka don ka thong ban kyntiew ïaka pule ka puthi ka dei ruh ban phai khmat sha kiba bun ki skul sha ki thaiñ nongkyndong ban wanrah ïaki skhim bad ban pynbiang katkum ki kyndon ba ki skul ki dei ban don naka bynta ka jingbit jingbiang jong ki khynnah pule.