62 ngut noh synñiang ei ïa ka snam ha ka Blood Donation Camp ha Star Cement Lumshnong

Khliehriat nailur 17: Ha ka Blood Donation Camp ba la pynlong hynnin ka sngi ha Star Club jong ka Star Cement Lumshnong, ki la don haduh 62 ngut ki briew kiba la wan shakhmat ban ai ei ia ka sam, 60 ngut ki dei ki nongtrei jong ka company Star Cement bad 2 ngut ki dei kiba na ka Kyrmen Foundation.
Ïa katei ka prokram la khot pynlong da ka Kyrmen Foundation ha ryngkat ka jingïatreilang bad ka tnat CSR jong ka company Star Cement lem bad ka Civil Blood Bank Jowai, u myntri ka sorkar jylla, u bah Kyrmen Shylla u la long kum u kongsan bad ka MLA jong ka Sutnga Saipung Constituenct, ka kong Santa Mary Shylla ka la long kum ka symbud kongsan.
Haba kren kum u kongsan, u bah Kyrmen Shylla, u la pynpaw ka jingsngewnguh bad ai khublei ïa ki hynriew phew ar ngut kiba la wan shakhmat ban ai ei ïa ka snam bad kane ka lah ban pyllait ïa ka jingim jongno re jongno jong kito kiba donkam kyrkieh ïa ka snam kiba don hapdeng ka jingshitom, u la kyntu ïa baroh ban don ka mynsiem ban iatreilang ban kyntiew ïa ka bha ka miat ha ka im lang ka sah lang, u la ai khublei ruh ïa ka tnat CSR jong ka company Star Cement kaba la ju noh syniang shi katdei eh ha kaba kyntiew ïa ka imlang ka sahlang ha ri lum Jaiñtia bad ha kiwei kiwei ki jaka ruh, u la ai khublei ruh ïa ka company kaba la aikam ai jam ïa ki briew jong ka thaiñ, ha kajuh ka por u kyntu ïa ka company ba kan nang thaw shuh shuh ki lad iohkam iohjam ïa ki paidbah ba kan long ka jingmyntoi ïa ki paidbah ka thaiñ.
U la ai khublei ruh ïa ki dkhot kiba na ka kynhun Kyrmen Foundation Ladrymbai, kumjuh ruh ïa ki doctor kiba la ïa don lang ha kane ka sngi kiba la kloi ban ai ka jingiatreilang.
U bah Kyrmen Shylla u la iathuh ruh katto katne ki kam ba radbah jong ka Kyrmen Foundation kaba la iarap ïa ki paidbah ha ki por ba ki donkam ïa ka jingiarap ba kyrkieh bad kane ka shlem ai jingiarap kan nang iai bteng shuh shuh ban ai ka jingshakri ïa ki paidbah kiba donkam ïa ka jingiarap ba kyrkieh khamtam ban pynpoi ïa ki sha ki jaka sumar.
Ka kong Santa Mary Shylla, ka la ai ka jingiaroh ïa ka Kyrmen Foundation bad kumjuh ruh ïa ka tnat CSR jong ka Star Cement ba ki la lah ban pynlong ïa kane ka prokram kaba jop bad kaban wanrah jingmyntoi ïa kito kiba donkam ïa ka snam, ka la bynrap ruh da kaba ong “Ban pyllait im ïa kawei ka mynsiem ka long ka jingkyrkhu”, ha kajuh ka por ka la air uh ïa ki kyntien kitbok kitrwiang ïa ka Kyrmen Foundation bad ïa ka tnat CSR (Star Cement) ba kin nang lah ban iaid shaphrang ha ki kam ba bha ban ai ka jingshakri kaba bha tam ïa ki paidbah ka ban long ka jingkyrkhu ïa ka im lang ka sahlang ban kyntiew ruh ïa ka bha ka miat ha ka thaiñ hi baroh kawei.
Kiba la ai jingkren ki kynthup ruh u heh jong ka Star Cement Lumshnong, u Tejbir Singh, ka Incharge Blood Bank Jowai, ka Dr P.Shylla, u samla Ripos Lyngdoh, na ka Kyrmen Foundation, u MDC ka thaiñ, u bah Emlangki Lamare bad ka kong Dayosha Biam, na Krmen Foundation.
Kiba la ïa don ryngkat lang ki kynthup u Representative Management Star Cement, u Devander Bansak, Senior Manager Star Cement Sidharrth Banerjee, u heh ka Topcem Coement, u R.K.Pareek, u heh na ka Max Cement, u Joshi Kumar Pawan bad kiwei kiwei, ïa ka prokram la pynbit pynbiang da u Manager CSR Star Cement, u Kingshok Borah.