6 persen mynjur ka Sorkar Jylla ban kyntiew tulop ïa ki nongtrei EMRI-108

Shillong, Rymphang 07 : Ka sorkar jylla ha ka sngi Balang ka la rai ban kyntiew haduh 6 persen ka tulop na bynta ki nongtrei jong ka 108 kiba la khih bad dawa ïa kane la slem bha.
“Kumta, mynta ïa kane ka kam ngin pyntyllun shakhmat bad kane ka 6 persen ka jingpynkiew tulop kadei hi ka hok kaba ki dei ban ïoh,” ong ka Myntri ka Koit ka Khiah, Dr. Ampareen Lyngdoh haba kren bad ki lad pathai khubor hadien ka jingkynduh ïa ki nongtrei 108.
La ïathuh ruh ba shwa kane, ki nongtrei ka 108 hapoh ka lama jong ka Meghalaya EMRI Workers Union (MEMRIWU) hapoh ka jingïalam jong u Bah Roipar Kharaswai ki la kynduh ïa u Mission Director bad ha kane ka jingkynduh la lah ban shim ïa katei ka rai ban kyntiew ïa ka jingsiew da 6persen ka tulop ba ki ïoh mynta bad ruh katkum ka jingtrei slem.
“Ki la kmen namar ngi la poi ban ïa mynjur katkum ki kyndon kumba ki la wanrah bad pynsngew hangi bad kumta ïa kane ka kam ngin pynïaid shakhmat,” la bynrap shuh shuh ka Myntri.
Ha kajuh ka por ka Myntri ka la pyntip ruh ba ka jingkhot tender ïa ki kompeni ban pynïaid ïa ka jingtreikam, kam shym la long kaba seisoh.
“Sniewbok ba ka tender kam shym la long kumba khmih lynti, kumta ngim pat lah satïa ban aiti ïa ki jingdon jingem bad ka bor pynïaid jong ka 108 sha ka bor kaban peit kum ka kompeni,” bynrap biang ka Myntri.
Hynrei ka la pynpaw pat ba hadien shibnai ar bnai kan don ka jingpynstet ïa ka tender na bynta ka bit ka biang jong ki nongtrei.
Na ka liang u President ka MEMRIWU, Bah Roipar Kharaswai u la pynpaw ïa ka jingkmen ba khatduh ka jingdawa ka la urlong. Tangba u ong ba ki kwah ba ka sorkar kan bteng ban pynïaid hi noh kumba ka leh baroh shi katta ïa ka 108.
Shuh shuh u la ong pat ba na ka bynta kiwei pat ki hok kiba kum ki nongtrei ki dei ban ïoh kum ka medical insurance, ka EPF, ka Health Insurance bad kiwei kiwei, ka sorkar ka lah ban wad ki lad ki lynti ban pyntreikam.