Shillong, Nohprah 09: U MLA ka north Shillong Constituency u Bah Adelbert Nongrum ha ka sngi Thohdieng u la aiti sha ki phra tylli ki kynhun ïa ki kali ba kynthup ïa ki kali kit nongpang bad ki kali kaba kin pyndonkam na bynta ban shakri ïa ki nongshong shnong ka North Shillong bad ïa ka jylla hi baroh kawei.
Kine ki 8 tylli ki kynhun kiba la ïoh pdiang ïa kine ki kali kiba u Bah Adelbert u la pynmang a ka MLA Scheme ki kynthup ïa ki kali kit nongpang sha ka KSU Jaïaw Circle, FKJGP Jaïaw Circle, HYC Mawkhar Circle, sha ka 17 North Shillong Constituency Implementation Committee ki kali na bynta ki jingdonkam ki kynhun ban pyntyllun ïa ka jingshakri ïa ka imlang sahlang kynthup ïa ka Church of God Educational Trust, La I Sap, Jaïaw Eh Rngiew Transport Society.
Haba kren ha kane ka jingïalang u Bah Adelbert u la ong ba ka jingaiti jong u sha kine ki kynhun ïa ka kali kam dei namar ba la dei ka aiom elekshon hynrei ka dei beit ka jingai beit ïa ka bhah ba dei hok na ka pisa ba la mang na bynta hi u paidbah da ka sorkar.
“Ka jingai jong nga kam dei namar ka elekson namar ngam da dei uba pylleit jingmut eh kum kiwei tang sha ka elekahon hynrei nga pylleit jingmut sha ka next generetaion ne ka pateng ban wan ban shakri hok ïa u paidbah da kaba pyrshang wanrah da ki aiñ bad ki policy kiba donkam na bynta u paidbah ka jylla bad ki pateng ban wan hi,” u la ong
U la ong ruh ba kine ki kali kim dei ban kut ka jingshakri tang na bynta kiba shong ba sah ha North Shillong hynrei ha baroh kawei ka jylla haba ki don kino kino ki khep ba ki donkam jingïarap na ki.
Ha kane ka sngi na ka liang u Bah Adelbert lyngba ka Implementation Committee ka 17 North Shillong u la pynkup burom ïa ki briew kiba la don ka jingsynñiang kaba khraw sha ka imlang sahlang, ïa ki nonghikai, ki samla ba pyndep ïa ka PhD, ïa ki briew kiba don ka jingduna dkhot met, ïa ki nongïalehkai bad kiwei kiwei.
