53 tylli ki snem ka jingïaid lynti ka Meghalaya, shongkun ka jingrakhe ha Patharkhmah

Nongpoh, K’Lyngkot 21: Ka ophis jong u Sub Divisional Officer, Patharkhmah ryngkat ka ophis jong u Block Development Officer, Jirang C&RD Block hapdeng ka jingiphuh iphieng bad ishongkun mynta ka sngi kala rakhe ïaka jingïaid lynti ba 53 snem jong ka jylla Meghalaya naduh ba kala ioh ïala ka jylla ba pura ha u snem 1972 ha phyllaw jong ka ophis u BDO Jirang Block.
Ha ka jingrakhe, u Bah Sosthenes Sohtun MLA ka Jirang u la shim bynta kum u kongsan haka jingdonlang u Bah MB Tongper SDO ka Patharkhmah Civil Sub Division, u P Hajong BDO, Jirang C&RD Block, Paiem S Wahlang Syiem ka Hima Jirang, ki riew rangbah naka thaiñ Jirang, ki SHGs lem bad kiwei kiwei.
Ka Dr. Margaret Lyngdoh, Folklorist jong ka University of Tartu Estonia kala shim bynta ban ïathuh khana ïaka mynnor ba kumno ka khana ka bteng ban ïasoh bad ka juk ba mynta, ba ka thymmei jong ngi ka wan na ei bad kumno kine ki jinghikai u mynbarim ki im bad pynlong ïangi kumba ngi long mynta haduh ban da ioh ïaka jylla ba pura.
Ka ophis u SDO Ptharkhmah hakatei ka sngi kila ioh ruh ban sam ïaki tablet sha ki samla pule naka thaiñ Jirang kaba dei ruh ka thong jong u Myntri Rangbah ka jylla ban pynkupbor ïaki samla pule jong ka jylla ba kin ioh ban pynkhreh ïaki eksamin ba lyngba katei ka Tablet bala sam lyngba ka Chief Minister’s Student Digital Learning Scheme.
Haba kren ha kane ka sngi u Bah Sosthenes Sohtun u la ai khublei ïaki paidbah jong ka jylla Meghalaya ha kane ka jingdap 53 snem jong ka jingïaid lynti naduh bala ioh ïaka jylla ba pura, bad ïaki nongïalam kiba shuwa kiba la iohi jngai ban saiñdur ïaka jylla ka jong ngi, naduh ka riam ka beit, ka kolshor tynrai.
U la ai ruh ka jingkhublei ba kyrpang ïa u Myntri Rangbah ka jylla halor ki thong ban nang kyntiew ïaka jylla naduh ka rep ka riang, ka pule puthi, ka koit ka khiah bad ka roi ka par ban nang lam shakhmat ïaka jylla lyngba ka sorkar MDA II da kaba phaikhmat ruh ïaka Jirang Constituency ba shibun ki jingkylla kila wan naduh ki lynti syngkien, ki surok ba ki paidbah ki ju ïaid haki khohruh khohram hynrei mynta kala pynsuk bad bun ki surok kila iong bad dep ban siang rong bad khamtam ka roi ka par ha baroh ki liang khamtam ka jingangnud jong ki paidbah ban plie noh shen ïaka Model Degree College ban nang kyntiew ïaka pule puthi.
U MLA u khot bad wer ruh ïaki paidbah, ki nongïalam shnong, ki nongïalam Hima ban dang ai ka jingïatreilang ban nang wanrah ki jingkylla nangne shakhmat, kumba ka 2 tarik Nohprah 2022 ka dei ka sngi sah kynmaw hadien ba u Myntri Rangbah ka jylla u la pynbna ban kyntiew kyrdan noh ïaka Patharkhmah Administrative Unit sha ka Civil Sub Division ha kaba mynta u snem yn sa ioh syndon da ka ophis treikam kaba pura bad naka liang jong u kum u MLA u angnud ba ka Jirang Constituency kan long kum ka model constituency ha kaba ïadei bad ki kam pynroi.