Bengaluru, Nohprah 17 : Ka jingpyni nam jong ka sorkar Jylla ïa u sohñiamtra ha Nongbah Bengaluru, kynthup ruh u sohtrun, ki jait jingbam ba bunjait, ki musli musla, shynrai nalor kiwei kiwei ki mar rep lyngba ka tnad ka rep ka riang ka la long kaba jop ha kaba ki paidbah na katei ka thaiñ ki la tuid ban wan ïashim bynta, ym tang ban mad hynrei da kaba thied bad rah ruh ïa ki sha la ïing.
Ïa kane ka jait prokram kaba long ruh shi bynta ka thong jong ka Sorkar ban ïarap ïa ki nongrep, la sdang ha ka 14 tarik Nohprah ha ki lai tylli ki dukan bah ne ki Mall kiba don ha kane ka Nongbah. Ha ki ar sngi kata ha ka 14 bad 15 tarik la pynlong ha phyllaw jong ka Lulu Mall kaba don ha Rajaji Nagar, ha ka 16 tarik la pynlong hapoh Forum Mall, Kanakpura bad mynta ka sngi kut jong ka 17 tarik Nohprah 2023 la pynlong ha Lalbagh, Botanical Garden, ha kaba da ki spah ngut ki paidbah ki ba la wan ban mad bad thied ïa kine soh.
U Bah Maqbool Lyngdoh Suiam, uba dei u ophisar jong ka tnad Agriculture bad uba peit ïa kane ka prokram haba ïakren bad ki nongthoh khubor u la ong ba ka thong jong ka sorkar jylla ban pynlong ïa kum kine ki jait prokram, ka long ban pynpaw pyrthei ïa ka jingriew spah jong ka Jylla Meghalaya kaba don ïa ki soh ki pai bad kiwei ki mar rep kiba khlem khleh dawai sboh, bad kumjuh ruh ban ïarap ïa ki nongrep.
“Ngi la dep ban pynlong ïa ka tamasa sohtrun ha Nongbah New Delhi bad ngi la ïoh ka jingïaroh halor ka jingbang bad jingthiang jong une u soh (sohtrun) bad mynta ruh kumjuh, ki briew na kane ka thaiñ ki la ai shisha ka jingïaroh ba u sohñiamtra ba ka jylla ka pynmih u long shisha uba bang,” ong u Bah Maqbool.
U la ïathuh ruh ba ïa kane ka program la thmu ban pynlong ha Mumbai, hynrei na kadaw ba la kyrkieh palat la rah noh ïa ka ha Bengaluru.
U Bah Maqbool Lyngdoh u la ong ruh, ba ka jingpynlong ïa kane ka prokram ka long kaba jop ba ki paidbah ruh ki wan ban thied ïa u soh. “Ka long shisha kaba jop, ki paidbah kiba wan ban mad ïa kine ki soh jong ka Jylla Meghalaya kim lah khlem thied bad rah sha ïing namar u long uba bang bad long pher na kiwei pat ki soh na kiwei pat ki jylla,” u la ong.
U bah Maqbool u la pyntip, ba ha kane ka ïew pyni nam ïa u sohñiamtra la wanrah 4 ton bad 1 ton u sohtrun ïa kaba la kit da ka liengsuiñ. Bad katkum ka jingïathuh jong u, haduh ka por 4 baje janmiet jong ka sngi ba khatduh la lah ban die haduh 70 percent kynthup kaba ai mad ïa ki paidbah.
“Ka sorkar mynta ka la shimkhia bha, ha kaba ïadei bad une u sohñiamtra namar ki tip ba udei u soh u ba la rim bha, bad ha ka jaka jong ngi baroh ka don 9 hajar akar bad ka jingpynmih ka long kumba 40 hajar metric ton. Bun ki dieng soh ki la duh noh namar ba ki la tymmen, kumta ngi hap ban thung thymmai ïa kine ki dieng sohñiamtra, bad lyngba jong kane ka Zestfest Meghalaya Khasi Mandarin, kan long ka jingïarap ïa ki nongrep jong ngi, bad ba ki paidbah na kiwei pat ki jylla bad na kiwei ki ri ka pyrthei kin tip ba ka jylla jong ngi ka long ka ba riewspah shibun”, la ong u Bah Maqbool.
U la ïathuh ruh ba ka sorkar kam kut tang ha kaban pynlong ïa kane ka prokram ban pyni nam ïa u sohñiamtra, hynrei kan sa pynlong de ïa kiwei ki prokram la ka long ïa u tit, u sohphan nalor kiwei kiwei ki mar rep kiba pynmih napoh la ka jong ka Jylla Meghalaya.