50 tylli ki snem dang hap shaniah ka jylla ïa ki kam ha kiwei..

0

Mynta la dap 50 snem naduh ka jingïoh jong ngi ïa la ka jong ka Jylla bad hapdeng ki jingïaid lynti lah ban ïohi ba ngi dang sahdien shibun eh ha ki jingtbit bad jingkotbor ban trei ïa ki kam ki jam bapher bapher khamtam ha ka liang ban kyntiew ïa ka roi ka par ha ka Jylla. Kitei baroh ki paw pyrthei lut ha ka por ba ka jylla ka dang don hapdeng ka jingïaleh ban ïakhun pyrshah ïa ka jingpang COVID-19, hadien ba ka Sorkar Jylla ka la rai ba kan hap phai khmat ruh sha ki kam ki jam ban kyntiew ïa ka ïoh ka kot bad kiwei kiwei pat ki kam ki jam ki ban pynim ïa ki paidbah nongshong.
Ym lah ban len ba ha kito ki por ba don ka jingkhang dam ha ka jingïaid lynti ban ïada ïa ka jinglah ban saphriang ka jingpang COVID-19, ka ïoh ka kot ka la hiar shibun eh ha ki khyndiat por bad ki longïing ki mad jingeh shibun eh naba kim ïoh ïa ka leit ka wan ka kamai kajih kaba thikna. Kumta ka Sorkar ka la rai ba ki company shimet, ki company na ka Sorkar bad ki contractor ki lah ban wanlam ïa kita ki nongbylla ba tbit (highly skilled labourers) ha ki jait kam bapher kiba ki samla jong ngi kim pat don jingtbit ne jingkotbor ban trei. Hangne kein ngi lah ban sngewthuh ba pleng ngi dang hap shaniah ha kiba nabar Jylla wat ha ki bynta jingtreikam khamtam ha ki kam Operator ne Technical.
Lada phaidien biang, ka rai jong ka sorkar jylla ban shah ba yn wallam ïa kita ki high skilled labourers na kiwei ki jylla ka pyni shai ba ka Jylla hi kam don kita ki briew ba tbit balade ban pynïaid ïa ki kam. Hap shaniah ha kiwei na ka bynta ka pliang ja jong ngi ruh??
Kumta lada ka long kumne, ka Sorkar ka dei ban peit mat nangne sha khmat da kaba ïaleh ban thaw ïa ki lad ki lynti ban pynshlur ïa ki khun samla trai Ri trai muluk ba kin nang bad tbit ha bun ki liang namar katkum ka jingiohi imat ha jan baroh ki jait kam dang hap shaniah hi ha ki nongbylla bad nongtrei bar jylla. Kumta ka Sorkar ka dei ban don ka plan kumno ban lam lynti ïa ki samla ban kham kiew sha khmat ha ki bynta jingtreikam bapher bapher naduh ki kam Operator, Technician bad kiwei bad ba ka pisa yn ym wan bam jem ei da ki ba na shabar.
Ka Jaidbynriew ka dei ban sngewthuh ruh ba ka jingtbit nalade bad ka jingbym ñiew poh ha ki bynta jingtreikam kan dei ka ILP kaba kham khlaiñ ban ïada ïa ka jingwan rung kyrthlep ki mynder ha ka Jylla. Lada ym pat nang ban ai ka jingshakri ynnai pat kwah long kynrad. Ka khaïi pateng ka dei kawei kaba kum ka Jaidbynriew ka dei ban teh lakam ha kaba da ma ngi hi ngi dei ban ym ailad ba kan poi sha kti kiba na shabar ka Jylla. Kumta ki samla kynthei shynrang kim dei eh ban shu hun ban long tang kum ki nongbylla kitnong hapoh ka jingpynïaid kiba na shabar Jylla.
Kaba khatduh ym kaba kut, ki khun samla ki dei ban minot bad buh thong ba ki dei ban lah ban leh ïa ka kam kaba ki don jingangnud ban nym ailad palat ïa kiba na shabar namar ban shu kut tang ha ka khynra ïa ki nongbylla bar jylla kan nym ïarap eiei ruh lada ym don ka mon ban trei hi dalade. Ka Sorkar kan hap peit bniah ba nangne sha khmat ki bynta jingtreikam kiba kumno ki khun samla ki donkam ban pyntbit la ka dei ha ki kam ban pynïaid ïa ki jingtei building, ki karkhana, ki company bad ka dei ban mang tyngka ban ai ka jinghikai ïa ki.

Leave A Reply

Your email address will not be published.