Jowai, Naiwieng 08 : U Symbud Myntri Rangbah ka sorkar jylla u ma Sniawbhalang Dhar ula ai sngewbha haduh 50 tylli ki laptops sha ki nonghikai jong ka Kiang Nangbah Govt. College Jowai, haka jingïalang ba la pynlong mynta ka sngi 6 tarik u Naiwieng ha Auditorium jong ka College.
Hashwa ban sam ïa kitei ki laptops sha ki nonghikai la ïoh ka jingkren na u i/c Principal ma Hercules Toi, da kaba u pynsngew ba ïa kine ki Laptop la kular ban pynïoh da u Symbud Myntri Rangbah naduh u bnai Nailur. Ula ong ka pyrthei jong ka Technology kala long kaba donkam eh bad ka rukom ai jinghikai sha ki samla pule kan ïadei bad kane ka juk stad ba mynta, u kyrmen ïa ki laptops kiba dang sah ban kynjoh sha ka 100 tylli baroh yn sa pynïoh ha kine ki bnai ban wan lyngba u MLA ka thaiñ u ma Wailadmiki Shylla.
‘Ka Kiang Nangbah kala kylla dur mynta na ka jingdon ki jaka ïaidkjat shwa ban rung shapoh ka College bad kane kala pynsuk shibun eh ïa ka ïaid ka ïeng” ong ma H. Toi. Ula pyntip ruh lyngba ka Master Plant yn sa pynbha ïaka College da kaba tei ïa ka Additional Building kaba saw mala.
Katba na ka liang u ma Sniawbhalang Dhar haka jingkren ula ong ka jingsam ïa kine ki 50 tylli ki Laptops sha ki nonghikai ka College ula pynïoh naka ka tulop la jong, ula pyntip ruh ïaka Additional Building jong ka College yn pynïoh Sanction kumba 25 haduh 30 klur tam ha kine ki bnai ban wan bad ha u snem ban wan 2026 yn pynbha sa ki kam ïalehkai Sports lyngba ki jingtei (infrastructure) hapoh ka College katkum ka juk ba mynta.
Kum u MLA ka thaiñ u angnud shibun eh ban pynlong ïa kane ka College kaba paw eh hapoh ka jylla, khnang ba ki samla nongpule kin thrang eh ban ïoh rung klass hapoh kane ka College, ha ka juh ka por u kwah ban pynduh pyndam noh ïa ki jingong jong kiba bun ba lang ‘kiba leit pule ha Kiang Nangbah ki dei tang kiba la shah kyntaid na kiwei pat ki jaka pule’. Ha kaba ïadei bad ka Auditorium u ma Dhar ula pyntip shen yn sdang ban pynbha thymmai noh ïa ka. Kine baroh ki don haka Blue Print jong u kum u nongmihkhmat.
Shuh shuh ula pynkymmaw ba ka Kiang Nangbah College Jowai kala pynmih shibun ki riew khraw kum ki Doctor, ki Engineer nalor kiwei de bad ka jingdon jong kane ka jaka pule kala ai jingshakri shibun eh ïa ki samla pule jong ka Ri-Lum Jaiñtia.
