Shillong, Rymphang, 21: Ka Iewduh, kaba long kawei na ki iew sahnam bad ka kad khaii kaba heh tam ha kane ka jylla, shen kan sa kylla long kum kawei na ki iew ba thymmai ka ban khring ruh ïa ki nongjngohkai pyrthei ynda ka Sorkar ka la mang pisa T.50 klur, la ïathuh u Myntri Rangbah ka Jylla Conrad K. Sangma haba ai jingkren halor ka mang tyngka ha ka sngi Balang.
U la ïathuh ba ka jingshna pynbha ïa ki surok kaba jrong 10-kilometre ha dohnud ka sor Shillong bad ka jingshna pynbna ïa ki 20 tylli ki khongdong surok la mang pisa palat T. 50 klur.
U Sangma u la ong ruh ba ka Comprehensive Mobility Plan na ka bynta ka Shillong bad ka Tura ka dang don hapdeng ka jingpynkhreh. Ïa ka Shillong Urban Mobility Policy ladep mynjur. Ban bud ïa ka State’s Electric Vehicle Policy 2021, haduh 100 tylli ki Electric Bus yn sa pynïaid ha Shillong bad ha Tura.
U la ong ruh ban weng ïa ka jingpynieng kali harud surok, ka Sorkar ka la pynkha 1,250 jaka ieng kali ha Shillong bad 150 tylli ha Tura, bad 100 ha Jowai ha kaba ka jinglut kan kot T. 150 klur.
Shuh shuh u Sangma u la pyntip ba ki projek bapher bapher hapoh ka Shillong Smart City ki dei kiba la jan dep. Ka Integrated Command and Control Centre bad ka Shopping Complex ha Polo ba la tei ha ka jinglut kaba T. 214 bad bad T. 100 klur yn sa pyndep noh hapoh une u snem.
