Khliehriat, Naitung, 01: Ki Pulit jong ka East Jaiñtia Hills Distrct ha ka sngi Saitjaiñ ki la ïoh kurup ïa u Ganja uba don ïa ka jingkhia kaba 50.03 kilo na kawei ka kali Santro katba ka dang wan na ka thaiñ Umkiang da ka jingthmu ban leit sha ki thaiñ Khliehriat.
Ha u kyrwoh, ki Pulit ki la ïathuh hadien ba la ïoh ïa ka jingtip kaba bniah ha kaba ïadei bad kawei ka kali Santro kaba don ïa u Registration Number TR kaba wan na liang Umkiang bad ïaid sha ka thaiñ Khliehriat kaba suba kit ïa ki mar kiba beaiñ, ki Pulit ki la pynlong ka jingpynap shrip ha Umtyra bad ïoh bat noh ïa kane ka kali kaba don ïa u Registration No TR04 A 0254 bad ïa ki sawngut ki briew kiba shong hapoh kali.
Kine ki sawngut ki dei kiba la tip kyrteng kum u Amit Mog , 29 snem rta uba dei na North District Tripura, u Rajesh Kumar Keang 33, na West Tripura, u Babu Mog 38, na North District Tripura bad u Sanjit Debarma 42 snem rta na West Tripura.
Nalor u Ganja kynja ki Pulit ki la kurup noh san tylli ki Mobile Phone, ka kali bad ka pisa T. 13540.
