41.157 kilo u Ganja Marijuana ïoh kurup ki Pulit East Jaiñtia Hills bad ïoh kem 2 ngut kiba donkti

Khliehriat, Nailar 01: Ki pulit jong ka East Jaiñtia Hills District, hapoh ka jinglamkhmat u DSP, u Jason Mairom, MPS, hynnin ka miet jong ka 31 tarik u naitung ha ka por 11 baje mynmiet ki la ïoh bat ïa kawei ka kali Alto kaba don u registration number AS-23-J-0171 ha Umtyra bad hadien ba la pynlong ïa ka jingkhynra, ki pulit ki la lap ïa u ganja Marijuana ba la song bha khop bad sop da ki brown tape, une u ganja u don haduh 41.157 kilo ba la thmu ban pynpoi sha nongbah Shillong.
Ïa kitei ki ganja la buhrieh bha hapoh ka bonet kali, ha ka engine kali, ki law bad buhrieh ruh ïa ganja hapoh ki head light kali bad buhrieh da kaba kinla law bad buhrieh ianki ganja nangta kin sa pyndait biang ïa ki head light kali.
Ki pulit ki la ioh bat ïa katei ka kali hadien ka jingpynap ktem ha Umtyra kata hadien ba ki la ioh jingtip ba tikna na ki tyllong ai jingtip.
Ha kaba ïadei bad kane ka jingkhaïi beaiñ ïa u ganja, ki pulit ki la kem noh ïa u Shir Debbarma, 37 snem kyrta, uba na ka shnong Ashigarh, West Tripura bad u Pradip Debbrama, 32 snem kyrta, uba na ka shnong Ram Durga, West Tripura District, ïa ka ejahar la register ha Khliehriat Police Station bad pynngat hapoh ki kyndon aiñ NDPS Act bad ka jingtohkit ka dang ïaid shakhmat ban lap dien shuh shuh ïa kiba don kti.
Ki pulit ki la kurup noh ïa utei u ganja, lem bad ar tylli ki mobile phone lem bad ka pisa T 10530 tyngka.