Shillong, Iaiong 18 : U Myntri rangbah ka jylla u Conrad K Sangma mynta ka sngi u la khot ïa ka jingïalang bad ka GHE_Connect ban ïa kren na ka bynta ban bteng biang ïa ka jingpynïoh bor ding elektrik na ka sngi (Solar light) sha ki shnong bad ki jaka ai jingsumar ha ka jylla, ki stoves shet jingshet bad kumjuh ruh ban kyntiew ïa ka pule dangleh lyngba kine ki bording ba ki khynnah skul kin ïoh beit ban pule ïa ki kot ki sla jongki khlem jingthut.
Ha kane ka jingïalang kaba la long mynta ka sngi ka la don ka jingai jingmut ban shna ïa ki LED Bolb ha kane ka jylla, kane ka jingpynïoh ïa ka bor ding na ka sngi ka la wanrah ka jingkylla ha ki nongkyndong ong u myntri rangbah ka jylla.
Haduh mynta ka GHE_Connect kala lah ban pyndait ïa ki kor ban pynïoh ding na ka sngi ha kane ka jylla sha ka 400 tylli ki tnum ïing, ka la sam ïa ki stove sha ki long ïing sha ki nongkyndong 5000 tylli.
Ha kane ka sngi u myntri rangbah ka jylla u la khot ruh ïa ka jingïalang jong ka tnad ba dei peit ïa ki kam bor ding ha la jylla bad ha kane ka jingïalang la ong ba la don kam ban leh ei ei ban shna noh ïa ka jaka pynmih bor ding na ka sngi lane ban buh ïa ka ‘Solar Park’ bad ban don ïa ka jaka thang ïa ki niut ki ñier ban pynmih bor ding.
