Bogota (Columbia) Jylliew 12: Yn nym don ba ngeit ban ong ba ki khynnah kiba hapoh 13 snem bad iwei i khunlung ba dang 11 bnai, kin im hapdeng ki lawbah lawsan jong ka Amazon ha ri Columbia haduh 40 sngi.
Hynrei kadei kadei kaba jia shisha ha Columbia ka ri kaba hap ha South America, ha kaba ka khlaw bah Amazon ka pur lang sha katei ka ri naduh ri Brazil.
Ïa kane ka ka jinglait im kaba phylla la lap da ki shipai ba leit wad ïa kine ki khynnah ha ka Sngi thohdieng mynta u bnai, kata ha ka 9 tarik. Kine ki khynnah kidei napdeng ki 7 ngut ki briew kiba la lait im na ka jinghap kawei ka eropleiñ kaba rit ha ka 1 tarik u Jymmang 2023, ha kaba ka kmie jong kine ki khynnah ryngkat u Pilot bad uwei pat uba haïing jong ki, ki la ïap ha kane ka jinghap kane ka eropleiñ hapdeng ka khlaw kaba shong da ki bseiñ, ki khñiang ba don bih, hynrei kaba don ruh ki soh, ki symbai kiba long ban bam.
Kine ki khynnah kidei i Lesly ba dang 13 snem, u Tien ba dang 9 snem, i Soleiny 5 snem bad i Christin ba dang 11 bnai.
Hadien ba la pynkit ïa ki da ki shipai sha jaka sumar ha nongbah Bogota, i Lesly i la ïathuh ha u kpa ba ka kmie jong ki, ka la im kumba saw sngi hadien kane ka jinghap ka eropleiñ, bad kine ki khynnah ki la bam ïa ki jingbam katba ïoh ei na kane ka pleiñ, kynthup ïa u jingbam ba long kum u ata. Hadien ba ka kmie ka la khlad noh, ïa kaba la lap da ki shipai ba leit wad ïa ki hadien kumba artaïew, kine ki khynnah ki la ïaid samkma hapdeng khlaw bad ynda la lut u jingbam ba ïoh na ka pleiñ, ki la bam da ki soh khlaw, ki sumbai ba la batai bha da ka kmie shuwa ba kan khlad. Nangta ki la shna da ki kynja ïing barit da ki sla dieng bad ki la ïaid na kawei ka jaka sha kawei pat.
Lyngba ka jingïarap jong ki nongshongshnong jong ki shnong kiba don ha khlaw Amazon, ki shipai ki la lap ïa kine ki khynnah kiba la rai khoh bad ring tyrkhong namar ka jingbym biang ka bam.
Mar ïakynduh ïa kine ki shipai hadien 40 sngi ba ki la im ha khlaw, ka Lesly ka la ong, “Nga thngan palat bad i Mei jong ngi, i la ïap”.
Kane ka khubor ka la pynkyndit bad pynlyngngoh ruh ïa ka pyrthei baroh kawei, ha kaba kiba bun ki la ong ba kadei shisha ka bor Blei. Hynrei ha kajuh ka por ki la ong ba kumno ka jinghikai ki kmie ki kpa ban tip ïaki khlaw ki btap bad ïa ki jingbam kiba don hapoh jong ka, ba kine ki khynnah ki la lait im.
Hapdeng kane ka jingim jong ki ha khlaw, i Christin i la dap shi snem ka rta bad kumjuh ruh i Soleiny i la dap 5 snem bad la long kumba ki rakhe sngi kha hapdeng khlaw.
