Shillong, Kyllalyngkot 12: U Myntri ka Sorkar Pdeng ba khmih ïa ka Ports, Shipping & Waterways bad Ayush, u Sarbananda Sonowal, mynta ka sngi Thohdieng ula plie paidbah ïa ki 4 tylli ki projek kiba kongsan ban kyntiew ïa ka jingsumar AYUSH hapoh ka thaiñ Shatei Lam Mihngi.
U Sonowal ula plie ïa ka Panchakarma Block kaba dei kaba nyngkong eh ha ka thaiñ, ka Pharmacology bad Biochemistry Lab kaba paka katkum kane ka juk kaba mynta na ka bynta ka Ayush ha ka jingïalang kaba la long ha Central Ayurveda Research Institute (CARI) ha Guwahati.
Nalor kane u Sonowal ula buh ruh ïa u mawnongrim ban tei ïa ka Campus kaba pura jongka Regional Research Institute for Homoeopathy (RRIH) bad jongka Integrated Ayush Wellness Centre ha Azara.
U Sonowal ula banjur ïa ka jingdonkam ban kyntiew ïa ka jingai jingsumar tynrai sha ka jingai jngsumar kaba katkum kane ka juk stad kaba mynta, da ka jingthmu ban kyntiew ïa ka met bad ïa ka bor jingmut jingpyrkhat jong ka thaiñ bad ka jingshim ïa ka sienjam ban don ïa ka Panchakarma block bad Ayush laboratory ka long kaba kongsan bha ha ka ban pynkhlaiñ ïa ka jingai jingsumar jong ka Ayush ha ka jylla Assam bad ha ka thaiñ shatei lam mihngi baroh kawei.
Ka Integrated Ayush Wellness Centre ka dei ka Centre kaba nyngkong tam hapoh ka ri.
Haba kren ha ka jingïalang, u Sonowal ula ong “hapoh ka jingïalam u Myntri Rangbah duh ka ri u Narendra Modi, la pynkylla ïa ka rukom ai jingsumar tynrai khnang ba yn pynkhlaiñ shuh shuh ïa ka jingai jingsumar hapoh ka ri”.
“La sakhi ïa ka jingseisoh jong ka jinglah ban pynkhiah lyngba ka jingai jingsumar kum ka Ayurveda, Yoga, Unani, Siddha, Homoeopathy, Naturopathy bad Sowa Rigpa, kumta ka long kaba donkam ba kine ki rukom ai jingsumar kiba naduh hyndai hynthai dei ban pynrung lang ha kane ka juk ai jingsumar kaba mynta” ula ong.
U Sonowal ula ong, ba kane kan ïarap shibun ha ka ban pynkhlaiñ shuh shuh ïa ka rukom ai jingsumar bad ka jingai dawai dashin ka ban pynkhiah ïa ka met ka phad bad ïa ka bor jingmut jingpyrkhat baroh.
Ula ong ba kane ka Panchakarma Block kaba thymmai bad ka Laboratory kaba paka jong ka Ayush ki dei ki sienjam ki ban ïarap ban kyntiew ïa ka jingai jingsumar lyngba ka Ayush ha ka thaiñ bad kane kan ai jingmyntoi shibun eh ïa ki nongshong shnong ka Assam bad ïa ki paidbah ka thain shatei lam mihngi baroh kawei.
Kumban shu pynkynmaw, 2 snem mynshwa, u Sonowal ha ka 12 tarik u Rymphang 2022 ula buh ïa u mawnongrim ban tei ïa ka ‘Panchakarma Block’ bad ka ‘Pharmacology & Bio Chemistry Labs’ da ka jingthmu ban kyntiew ïa ka Central Ayurveda Research Institute (CARI) kaba don ha Guwahati.
