Nongpoh, Lber, 09: Da ka jingïarap ki bor Pulit ka jylla Kerela, ki Pulit ka Ri Bhoi ki la ïoh ban kem biang ïa uwei u runar hadien saw snem tam, kaba dei hadien ba u la ïoh ban phet tuh na ka jingset ïa u ha thanad halor ka jingkynnoh ba u la don kti ha ki kam tuh ba la ujor pyrshah ïa u ha Khanapara Police station katkum ka Case No. 52(11)2020 u/s 381 IPC.
Kumba la pyntip da u Heh Pulit ka Ri Bhoi, une u runar ba la lait phet na ka jingshah set ha thanad ka Khanapara ka dei ha ka 20 tarik u Naiwieng 2020 bad naduh katei ka sngi u la phet tuh ïa lade ban lait na ka kti ki pulit kaba la kot mynta haduh 4 snem tam.
Une u runar ba la ïoh kem biang da ki Pulit ka Ri Bhoi, da ka jingïarap ki Pulit ka Kerela, la tip kyrteng kum u Ranjan Borgohain, uba shong basah ha Duliajan ba hap ha ka Dibrugarh jong ka jylla Assam.
U Heh Pulit ka Ri Bhoi, u V.S Rathore, u la pyntip ruh ba ïa une u runar la lap ïa ba u don ha Kerela ha kine ki taiew ba la dep bad uba trei ruh kum u nongtrei bylla ha kawei ka Karkhana ha ka thaiñ Perumbavoor jong ka jylla Kerela.
U la ïathuh ruh kumba la ai jingtip ïa une u runar sha ki Pulit ka Kerela bad la pan jingïarap ruh ban ïa trei lang ban ïoh kem ïa u, la phah noh ïa une u runar sha u heh pulit ka Ernakulum District jong ka jylla Kerela.
“Dei lynba ka jingïarap ki Pulit ka Ernakulum la ïoh ban kem ïa une u runar ha ka 7 tarik u Lber 2025 bad la pan bor ruh na ka ingkashari, ha kaba ïa une u runar la wan rah noh sha Ri Bhoi ban tohkit bad ruh ban aiti sha ka Chief Judicial Magistrate Nongpoh ban bishar ne tohkit halor kine ki kam tuh jong u” ong u heh pulit ka Ri Bhoi haba phah khubor sha ki lad pathai khubor.
Ki Pulit ka Ri Bhoi ki la ai khublei kyrpang ruh ïa ki Pulit ka jylla Kerela, namar dei lyngba ka jingïatrei lang ba la ïoh biang ban kem ïa une u runar uba la phet rieh la saw snem mynta.
