4 ngut ki samla na South West KHD kin mihkhmat ha ka 44 Softball Senior National C’ship 2023 ha Odisha
Mawkyrwat, Rymphang 02 : Ka long kaei kaei ka jingaimynsiem ïa ki samla jong ka dong ka thaiñ Mawkyrwat bad ka South West Khasi Hills District ha kaba katba nang mih ki sngi ki samla ki la sdang ban kiew ha kiba bun ki bynta khamtam eh ha ki jingjait jingïalehkai, ha kaba mynta ka kynti ki 4 ngut ki samla kiba napoh ka South West Khasi Hills District ki la shah jied ban mih ïa la Jylla Meghalaya ha ka 44 Softball Senior National Championships 2023 (SSNC) 2023 ha Odisha.
Ki saw ngut ki samla ki long kiba la shah jied ki long u Donbokelson Marweiñ, u Deibanshanbor Mylliem bad u Luckystar Marweiñ na ka shnong Mawlangwir bad u Joyfullness Nongsiej na ka shnong Mawkyrwat, South West Khasi Hills District.
Halor kane ka jingsah jied jong ki, mynta ka sngi na ka liang ka Mawkyrwat Youth Development Association (MYDA) da ka jinglamkhmat jong u President, u bah Elevenson Wanniang ha kaba kum ka dak jong ka jingaimynsiem ïa ki, u la ïoh ban pynkup burom ryngkat ki kyntien ai mynsiem ïa ki ba kin long ki briew kiba trei shitom bad minot ha kane ka kam khnang ba kin lah ban wanrah bad ïoh kheit ïa u soh jong ka jingjop.
Ha kajuh ka por, ka South West Khasi Hills District Softball Association (SWKHDSA) ka la kitbok kitrwiang ïa ki samla napoh ka shnong Mawlangwir bad Mawkyrwat ki ban sa leit mihkhmat ha ka 44 Softball Senior National Championships 2023 ka ban long ha Jylla Odisha ka ban sdang naduh ka 5 tarik bad kan kut haka 9 tarik u Rymphang 2023.
Kumta, na ka liang u Secretary jong ka South West Khasi Hills District Softball Association (SWKHDSA), u bah Benjohnson Lyngdoh bad u bah Polin Lyngdoh, President mynta ki sngi ha shwa ba ki 4 ngut ki samla kin mih na Mawkyrwat, ki la ai ki kyntien jingkyrkhu kyrdoh bad ki da kyrmen skhem ba kane ka jingleit ïa shimbynta jong ki bad ïoh ban mihkhmat ïa ka jylla ryngkat bad kiwei de ki para nongïalehkai lang kin sa wanrah ïa ka nam bad ka burom ym tang ïa ki hynrei ïa ka jylla hi baroh kawei.
Lah ban kdew ba ha kane ka jingleit ïashim bynta jong ki ha kane ka 44 Senior National Softball Championships 2023 ki don baroh haduh 15 ngut kiba kynthup na baroh ki distrik hapoh ka jylla Meghalaya bad napdeng kine ki 15 ngut kiba la shah jied kaba sngewsarong ka long ba 4 ngut ki dei na ka South west Khasi Hills District kata na shnong Mawlangwir 3 ngut bad uwei na ka shnong Mawkyrwat.