SHILLONG, Nailur 06: Ki jingïalehkai ka lympung Third Division 2024 jong ka Shillong Sports Association ba la long ha ka Sngi Thohdieng (06 tarik Nailur, 2024) ha SSA Ground, Polo la sakhi ïa ar tylli ki kynhun ba kynthup ïa ka Gorkha Association bad ka Mawpat SC kiba la jop kput ha ki jingïalehkai ban khur pura ïa ki lai point.
Ha ka jingïalehkai kaba nyngkong, ka Gorkha Association ka la pynjemkhnap ïa ka Lumdiengjri SC da 6-2 kol. U Yash Kanwar u la ïoh ban khyrwit hat trick na bynta ka Gorkha Association (60, 70 & 80 minit), u Aman Gurung u la pynkhihjar ar kol (29 & 88 minit) katba u Thomash u la thep kawei ha ka minit ba 9.
Na ka liang jong ka Lumdiengjri SC ki ar kol la thep da u Desilva Pyngrope (32minit) bad na u Wallambok Buhsah (89 minit).
Haba phai sha ka jingïakhun kaba bud, ka Mawpat SC ka la pynbam kput haduh 8-1 kol ïa ka Krang SC ban pynthikna ïa ki lai point. U Kordinus Kharkongor u la long u namtam ha kane ka jingïakhun da kaba pynkhihjar haduh saw kol (18, 63, 65 & 70 minit). Katba u Alanson Thangkhiew (8 min), Jonathan Kharkongor (24min), Tolammamee Mylliempdah (83mins) bad u Angelius Nongrum (87min) ki la ïoh ban thep mar kawei.
Ka shi kol na bynta ka Krang SC kadei kaba la kum bakla thep hi da u Daniel Shadap (Own Goal) ha ka minit ba 50.
Ki jingïakhun ha kane ka Sngi Saitjaiñ (07.09.2024) kan long ha ka kyrdan Second Division, ha por 12:30 baje mynsngi ha kaba ka Sohiong SC kan aireng pyrshah ïa ka Umphrup SC, nangta bud sa ka jingïakhun ha ka por 3:30 baje nohphaisngi hapdeng ka Laitkyrkhong SC pyrshah ïa ka MLP FT.
