Jowai, Naitung 12: Ka resol jong ka lympung ïalehkai phubol ha ka kyrdan Third Division 2025 League Stage, bala pynïaid da ka East Jaiñtia Hills District Football Association (EJHDFA), kaba la long ha ka sngi Saitjaiñ jong ka taïew ba ladep (12 tarik, Naitung) ha madan Artificial Turf Diengshynrum, Khliehriat East Jaiñtia Hills District.
Ki jingïalehkai ha katei ka sngi la sakhi ïa ka Moolang SC, ka Lumshyrmit SCSC bad ka Suchen Lumiarain SC kiba la jop ïa la ki jong ki jingïalehkai.
Haba phai sha ka jingïakhun kaba nyngkong ka Moolang SC kala jop da 2-1 kol ïa ka Umrasong SCSC. Baroh ar tylli ki kol la thep da u Riping Dkhar na ka bynta ka Moolang SC, kawei ha ka minit kaba 6 bad ha ka 74 minit. Ïa ka shikol na ka Umrasong SCSC la thep da u Josting Papiah haka minit ba 17.
Haba phai pat sha ka jingïakhun kaba ar ka Lumshyrmit SCSC kala jop da 3-1 kol ïa ka Pynurkba Christian SC.
Dei ka Pynurkba Christian SC kaba la ïoh lamkhmat nyngkong lyngba u Kitbok Pdang haka minit ba 5 hynrei ka Lumshyrmit SCSC ka la jibab da kaba pynphai lai kol lyngba u Bikel Khaïi ha ka 6 minit, nangta bud sa na u Blining Dkhar haka minit ba 21 bad u Khroo Dkhar haka minit ba 25 jong ka kylla step.
Katba ha ka jingïakhun kaba lai Suchen Lumiarain SC kala jop da 2-0 kol ïa ka Dkhiah East SC, ïa kitei ki ar kol la thep da u Join Khaïi haka minit ba 42 bad u Shar Sumer haka minit ba 61.
Na ka liang jong ki nongpynïaid ki la pyntip ba ka jingïakhun kan bteng biang haka sngi nyngkong 14 tarik ha ki ar tylli ki jingïakhun.
