3 sngi lynter naduh ka lehñiam Lukhmie, ki khun ki hajar ka Raid Marngar kim bit ban ot kba bad rong kham

Nongpoh, Naiwieng 18: Ka Jinglehñiam Lukhmie ba shisien 5 snem jong ka Raid Marngar kaba hap hapoh ka Mylliem Syiemship ka dei shisha kawei naki jinglehñiam kaba kham pher bad pawnam hapoh ka Raid bad ka Hima, ban ainguh aidem ïa u Blei nongbuh nongthaw shuwa ba kin hiar sha ki pynthor ban ot ïa u kba, u soh jong ka jingtrei shitom jong ki baroh shisnem nalor ka duwai ka phirat ban bit ban biang haki saw samoi, ban pahuh pahai ka bam ka dih, ban koit ban khiah krat bad khamtam ba u Blei nongbuh nongthaw un ïada na kino kino ki jingshah lyngshop.
Kum ban shu kdew hangne ba ïa katei ka jinglehñiam la pynlong hynnin ka sngi u Blei, shisien haka 5 snem ban pyndep ïaka ñiam ka rukom, ka ainguh aidem bad ka kñia ka khriam ha shuwa ba ki khun ki hajar kin ot ïa u kba, kumta haduh lai sngi lynter ki khun ki hajar kim ju bit ban ot u kba na ki pynthor ne ban kit ban rong kham, kata ka long naduh ka sngi u Blei bala pynlong ka jinglehñiam, ka sngi nyngkong bad sngi ba ar, ha sngi balang pat ki la lah ban ot ïa u kba u khaw lajong.
Katkum ka jingngeit hapoh ka Raid naduh kulong kumah, ka sngi nyngkong hadien ka jinglehñiam ka dei ka sngi ban pyndep ka kñia ka khriam ha man la ki thliew ïing, ha ka sngi ba ar pat ka dei ka sngi ba shong thait ka Blei Lukhmie Lukhimai, Lukhimon, kum ka dak ban burom, hadien ba lah dep ïa ka ñiam ka rukom ban ai nguh ai dem ïa u Blei trai kynrad, u nongbuh nongthaw u ba la wan kit wan bah ïa ka Blei Lukhmie Lukhimai namarba ka blei Lukhmie ka la rung ha ki man la ki thliew iing da ka jingsuk jingkmen bad poi suk poi saiñ ha man la ki thliew ïing.
Shuh shuh lada don kiba ïaleh pyrshah ïa kitei ki sngi ba lah kdew haneng, bad ki riti ki dustur bala buh da u mynbarim, ki longshuwa manshuwa, u Syiem bad ka Dorbar Raid ka daiñ kuna ïa kito ki briew kiba ïaleh pyrshah bad kiba bym burom ïa ka riti ka dustur katkum ka kyndon Raid ba la buh, kata ka long kawei ka sñiang, ka pisa, u klong u skaw bad u kwai tympew.
Kane ka rukom lehñiam ka dei ruh kaba bun naki briew ki ïaroh khamtam ka jinglah ban tyngkai bad pynneh pynsah ïaka riti ka dustur ka kolshor tynrai bala buh bad hikai da ki longshuwa manshuwa namar kumba long mynta bun naki Raid kila sdang ban klet noh ïala ki riti dustur, ki kolshor tynrai namar ka jingkylla jong ka juk bad ki briew, hynrei ka long kaba kongsan ban pynim bad hikai ïaki longdien ba kin tip ïala ka tynrai ba ka tynrai bad ka riti dustur kin neh kin sah.