Nongstoiñ, Nailar 22: Ki katto katne ngut ki samla jong ka shnong Langshongthiang, kaba dei kawei na ki shnong kaba don ha ka thaiñ Jaïaw Shallang jong ka West Khasi Hills District, ki la pynpaw ïa ka jingbynñiaw namar kat haduh mynta ka sorkar kam pat tei satia ïa ka Sub Centre ha katei ka shnong, wat haba ka la kular naduh mynshwa bad la pynïoh ruh ïa ka jaka.
La ong ba ka kur Mawsor ryngkat ka jingïasngewthuh jingmut lang bad ka shnong Langshongthiang, ka la dep ban ai sngewbha ïa ka jaka kaba heh kumba 3 akar ei ei, da ka jingangud bad khmih lynti ba kan long ka jingkyrkhu kaba khraw ïa ka shnong, lem bad ïa kiwei pat ki shnong kiba marjan kiba don kumba 5 ne 6 tylli ei ei bad ki khmih lynti ruh ban urlong ka jingtei ïa ka sub centre ha katei ka shnong.
Hynrei, kat haduh mynta mynne ym pat pyni dak ei ei ruh em ba la sdang ban leh ei ei ïa katei ka jaka sumar nongpang, hynrei la shu ieh shrah beit kumto kumba ka long haduh mynta la kumba 10 snem ei ei.
U bah Daliwell Mawsor uwei na ki samla rangbah jong katei ka shnong, u la ïathuh ba katei ka shnong ka la don kumba 160 ei ei ki tnum ïing bad baroh kiba donkam haba ïadei bad ki dawai dashin, ki hap ban leit shaduh ka shnong Umdang ha ka jingjngai kaba kumba 10 km ei ei.
Kumta ka long kaba shem shitom shibun khamtam ïa ki longkmie kiba armet bad kiba dang ïoh khunlung ba kin leit ban phah ai injek, khamtam eh ïa u duk u suk, u kum shilliang sem shilliang u bym don kali lajong.
Kumta na ka liang ka Kur Mawsor ka sngew ban kyntu sha ka sorkar Jylla bad sha u local MLA, ban shimkhia halor kane ka bynta kaba donkam ha ka jingïadei bad ka koit ka khiah bad ki lad jingsumar na ka bynta ki paidbah nongkyndong.
