Mairang, Risaw, 14: Kum ka jingrakhe ba kyrpang ïa ka jingdap 75 snem jong ka jinglaitluid jong ka ri India kaba la tip kum Azadi Ka Amrit Mahotsav, ka ophis jong u District Sport Officer bad District Sports Promoting Society, West Khasi Hills, kan pynlong ïa ka jingïamareh thong lane Fit India Freedom Run kaba 8 kilomitar ha ka 27 tarik mynta u bnai.
Ha u kyrwoh ba la phah mynta ka sngi da ka kong Balarina Syiem District Sports Officer, la ong ba ha ka katei ka jingïamareh thong yn pdiang ïa baroh shynrang bad kynthei kat kiba kwah ban wan ïashim bynta. Hynrei, ki hap ban pynpoi ïa ki kyrteng jong ki ha ophis jong u DC Eastern West Khasi Hills Mairang, ha lane shuwa ka 26 tarik mynta u bnai ha ka por long trei bad kiba wan ai kyrteng, ki dei ban wanrah lang ïa ki original birth certificate na ka bynta ban pynshisha.
Na ka bynta kiba wan ai kyrteng hadien katei ka tarik ba la buh yn ym pdïang shuh bad kiba lah ban ïashimbynta kin dei beit tang na West Khasi Hills. Ïa katei ka jingïamareh, yn sdang na phyllaw jong ka ophis u Deputy Commissioner Eastern West Khasi Hills District bad baroh ki nongïashimbynta, kin pynpoi lypa ha ka por 6.00 baje mynstep. Ki buskit na ka bynta ki nong jop ki don lai tylli ba kynthup ïa ki shynrang bad kynthei, kata ba nyngkong Rs 5000 tyngka ba ar Rs 3000 tyngka bad ba lai Rs 2000 tyngka.
Na ka bynta ki jingtip ba kham bniah lah ban ïakynduh bad ki bor pynïaid ka ophis lane phone ha u 9402300795/9436100795/8014251242/8732804252.
