25 hajar ki tynrai dieng yn pynjyrngam ïa ka shnong Mawtari Thaiang ha Ri-Bhoi

Nongpoh, Jylliew 05: Ka ophis jong u Block Development Officer, Umsning C&RD Block haka jingïatreilang bad ka Grassroot mynta ka sngi kila shimbynta ban rakhe ïaka sngi pynneh mariang ne ka World Environment Day haka shnong Mawtari Thaiang ha Ri-Bhoi District bad ha kane ka sngi naka liang ka Grassroot kala wanrah ruh ïaka Project thungdieng bad aiti kumba 25 hajar tylli ki tynrai dieng ban pynjyrngam ïakatei ka shnong ka ban sa pyntreikam ruh ryngkat bad ka skhim MGNREGA ban pyndep ïa katei ka jingthung dieng.
Ha katei ka sngi ka jingrakhe ïaka sngi pynneh mariang la sakhi ruh da ka jingdon u Bah Charles Marngar MLA ka Mawhati kum u kongsan haka jingdonlang u Bah Andrew L Myrthong BDO ka Umsning C&RD Block, ka kong Mayfereen Ryntathiang President ka Grassroot, Bah Tolbin Umbah Rangbah Shnong lem bad ki samla pule, ki khynnah skul, ki longkmie longkpa na katei ka shnong.
Ka Kong Mayfereen kala ong ba kaei ka daw bala pynlong ïaka Grassroot ban wanrah ïa katei ka project ka dei namar ka jingkylla jong ka mariang bad ban pynjyrngam biang sa shisien ban ïa ka shnong Mawtari hadien ka jingtreikam lang kaba la bun snem ban pynlong ïa katei ka shnong ban long ka nuksa bad ka nonglam lynti ha kaba ïadei bad ka jingpynneh pynsah ïaka mei mariang.
U Bah Andrew L Myrthong BDO ka Umsning C&RD Block u la ong ba ka long kaba kongsan ban pynneh pynsah ïaka mei mariang bad kane ka jingai sngewbha jong ka Grassroot ïa kitei ki tynrai dieng kan long ka jingkyrkhu kaba khraw ïakatei ka thaiñ kumba ha kine ki sngi ngi sakhi ïaka jingkylla jong ka suiñbneng kaba dei tang nakadaw ba u bynriew um nang ban sumar ïa ka mariang kaba u nongbuh nongthaw u la buh.
Kane ka jingrakhe ïaka sngi pynneh mariang ka long ruh ban ai mynsiem ïaki paidbah halor ka jingdonkam ïaka jingpynneh pynsah ïaka mei mariang, kumba ka jylla jong ngi ka dei ka jylla kaba u Blei u la kyrkhu kyrhai da ka mariang bad ki sawdong sawkun kiba itynnad bad lyngba jong kane ka project ngi kyrmen skhem ba kum ki paidbah kin sngewthuh shai kaei ka bynta ban leh ban pynneh pynsah ïaka mariang.
Naka liang u Bah Charles Marngar kum u kongsan haba kren ha katei ka sngi u la pynpaw ka jingsngewkmen ban poi ha katei ka shnong kaba don kham sha kyndong hynrei ki sawdong sawkun kiba itynnad ba kum ki paidbah ki dang lah ban pynneh pynsah ïaka mariang.
U la ong ruh ba ka jingkylla ka mariang kadei kawei naki mat ba ka pyrthei ka ju ïakren naka por shaka por bad lah ruh ban sakhi tang ha kane ka jaka bun ki jingkylla jong ka mei mariang bad kala dei ka por ba ki briew kin sngewthuh khambha ba ka jingrakhe ïaka sngi pynneh mariang kam dei ban long tang haka shi sngi, hynrei ban don ka jingkitkhlieh ban bujli ïa kaei kaba ngi la pynjot bad khmih lynti lyngba kane ka project kan long shisha ka jingkyrkhu bad ka nonglam lynti na katei ka shnong ha Ri-Bhoi ba sa shisien ki khlaw kin jyrngam bad ki jingthaw baim baroh kin lehkmen.