2 tarik Jylliew yn ïa kynduh ki Myntri Rangbah ka Meghalaya bad Assam ban ïa kren pynbeit pud ha ka wat Ba ar

Shillong, Jymmang 28 : U Myntri Rangbah ka Meghalaya u Conrad K Sangma bad u Myntri Rangbah ka Assam u Himanta Biswa Sarma kin ïa kynduh ha ka 2 tarik Jylliew ha nongbah Guwahati na ka bynta ban ïakren ban ïa pynbeit pud ha ka Wat kaba Ar.
Haba ïathuh ïa kane mynta ka Sngi Balang u Chief Secretary ka jylla u bah D.P Wahlang u la ong “Ngi ïai bteng ban ïakren na ka por sha ka por bad mynta ka jingïakynduh jong ki ar Myntri Rangbah kan long ha ka 2 tarik Jylliew 2025”.
Baroh ar ki sorkar jylla kata ka jylla Meghalaya bad Assam ki la thaw da ki Regional Committee ba la khlieh da ki Myntri Sorkar bad ki MLA jong kito ki jaka ba hap hapdeng ka jingïakajia pud bad kiwei kiwei ki heh sorkar ban ïakren bad ïa pynbeit ïa u pud jong ki hynriew tylli ki jaka ba dang sahteng. Kine ki Committee kila ïa kynduh lang bad ki la leit pynlong ruh ka jingjurip lang sha kitei ki hynriew tylli ki jaka shwa ba ki ar myntri rangbah kin ïakynduh.
Ki kyndon ba ki la bud ha kane ka jingïakren ki long kat kum ka jingmynjur ban peit ïa ka histori jong ki jaka ki hap shano mynshwa, kiei ki jaitbriew kiba sah ha kitei ki jaka bad kaei ka ktien ka tylliej bad rukom im jongki, ban pan ka jingmynjur na ki paidbah ki kwah ban don sha kano ka jylla bad kumta ter ter. Kine ki hynriew tylli ki jaka ba dang sahteng bad bym pat lah ban pynbeit pud ki long ka Langpih, Borduar, Nongwah -Mawtamur, Deshdoomreah, Block I & II, Psiar bad Khanduli.
Ki lai tylli ki Regional Committee jong ka jylla Meghalaya kim pat aiti ïa ki kaiphod jong ki sha ka sorkar jylla wat la dep ai por ïa ki tad haduh ka 31 tarik Lber 2025. “ Ka daw ka long ba ka kham jwat ban shim rai ha kaba ïadei bad ka Block I , Block II bad Langpih.
“ Kumta kine ki Committee ki la pan por shwa na ka sorkar jylla bad kumta la aipor shuh shuh ïa ki bad kane ka jingïakynduh ki ar myntri rangbah ka long ban ïakren bad ïa pynbeit halor kine ki jingïapher jingmut ka ban long ha nongbah Guwahti ha katei ka 2 tarik Jylliew” ong u Chief Secretary.
Halor ka jingdawa ban wanrah ïa ka Block I bad II sha Meghalaya, u Chief Secretary u la ong “ Kane ka dei ka bynta kaba kongsan eh ban ïakren bad ka Assam. Ngam lah ban ong lane rai marwei halor kane hynrei ynda la ïakynduh ki ar myntri rangbah bad ki heh sorkar jong baroh ar ki jylla ngin sa ïakren bha ïa kane ka mat”.