Jowai, Risaw 19 : Ka lympung ïalehkai jong ka kyrdan 1st Division Football Tournament, 2022 ïa kaba la ai kyrteng ka ‘Chatister Kharkongor Memorial Trophy’, kaba la long mynta ka sngi ha Kiang Nangbah Stadium, Dongmihsngi Jowai.
Ïa kane ka lympung la pynïaid da ka West Jaiñtia District Sports Association (WJDSA) shi bynta na ka jingrakhe jubilee ksiar jong ka Association kaba la jam sha u mawmer ba 50 snem jong ka jingshakri ban pynkiew ïa ka kam ïalehkai Sports hapoh ka District.
Haba phai sha ka jingïakhun na ka liang ka kynhun ïalehkai jong ka Demthring SC kala lah ban pynliem da 2-0 kol ïa ka Chutwakhu SC, ïa kitei ki kol na ka Demthring SC la thep da u Richard Suting ha ka minit ba 23 bad u Spain Ryngkhlem ha ka minit ba 83.
Ka kynhun ïalehkai jong ka Chutwakhu SC kala pyrshang katba lah ban pynphai ïa kitei ki kol hynrei kam lah satia tad haduh ba kut jong ka jingïalehkai kala neh da 2-0 kol.
Ka jingïakhun lashai ka sngi 20 tarik kan long hadpeng ka Shangpung Moosyiem SC pyrshah ïa ka Dulong SC ha ka por 2 baje shiteng nohphai sngi.
