1967 klur shisnem tang ka tulop ki Nonghikai siew ka sorkar bun eh sha ki Private Skul haduh 917 klur

Shillong, Kyllalyngkot 22 : Ka sorkar jylla lyngba ka tnad pule puthi ka pynlut 1967 klur tyngka shisnem tang ban siew tulop sha ki Nonghikai ba kynthup naduh ki skul sorkar, ki skul Private bad ki Nonghikai SSA. Na katei ka pisa kaba bun eh ka jingpynlut ka dei ka jingsiew tulop sha ki skul Private namar ka long haduh 917 klur tyngka.
Nalor katei ïa ki Nonghikai sorkar ka jingsiew tulop ka long 684 klur tyngka shisnem bad sha ki Nonghikai SSA ka jingsiew tulop ka long 366 klur tyngka shisnem. Katei ka jingsiew sha ki skul private ka kynthup naduh kito ki skul Deficit, kiba ïoh Grant In-Aid, ki Adhoc skul bad kito kiba ïarap thung nonghikai da ka sorkar.
Ka jingdon ki Nonghikai ha baroh kawei ka jylla ki long 55,160 ngut. Ka jingdon pat jong ki skul ha baroh kawei ka jylla ki long 14,582 tylli.
Lada phai pat sha ki College ka sorkar ka pynlut 37.08 klur ban siew tulop ïa ki Nonghikai ha ki College Sorkar, 179.7 klur sha ki College Private bad na kine tang sha ki 13 tylli ki private College ka sorkar ka siew 121.66 klur tyngka ha ka shisnem. Tang sha ki College ha ka shisnem ka sorkar ka pynlut 218.68klur tyngka ha ka shisnem ban siew tulop ïaki Nonghikai.
Haba phai sha ka jingïarap ka sorkar la jan man la ki skul bad college ki la ïoh jingïarap na ka sorkar hynrei ki don pat ki skul bad ki College kiba shim bai skul da ki phew hajar bad lak tyngka halor ka nongrim ban ïoh siew tulop ia ki Nonghikai.