19 tarik yn pdiang burom ka Jylla ïa u Steve Jyrwa hadien ba jop ha ka India’s Best Dancer

Shillong, Naiwieng 16 : U lahduh ha ka India’s Best Dancers ka lympung shad ba heh tam ha ka ri India, u Steve Jyrwa un wan ban ai khublei ïa ki paidbah ka jylla ha ka 19tarik mynta u bnai ha ka jingïalang kaba la pynkhreh kyrpang kaban long ha madan Polo ha ka por 2:00 baje mynsngi.
Na ka lïang u President jong ka All Meghalaya Dancer’s Association, Bah Kitbok Thabah u la pyntip ruh ba ki khmih lynti ba ha katei ka sngi ki paidbah kin ïoh lad ruh wat ban sakhi ïa ka jingshad na utei u nongshad ba pawnam ba ka jylla ka sei.
Katba na ka liang ka Meisan jong u Steve, Kong B Jyrwa ka la ong ba kum ki bahaiing bad na ka liang ka AMDA ki khot ki wer ïa baroh ban snohkti lang ha ka jingpynkup burom ïa u Steve ha katei ka sngi.
Haba kren bad ki lad pathai khubor, u Bah Kitbok Thabah u la ïathuh ba hadien ba u Steve u la ïoh ban khur ïa ka nam lahduh na ka liang ka AMDA ki la pynkhreh ïa ka jingpynkup burom ïa utei u samla ha katei ka sngi.
“Ngi la pyntip ruh sha u Myntri Rangbah ka Jylla, sha u Symbud Myntri Rangbah, Bah Sniawbhalang Dhar, Bah AL Hek kumjuh sha ki Myntri Sorkar haba ïadei bad kane ka jingpynkhreh,” u la ong.
Nalorkata, u ong ruh ba ki kyntu ïa ki seng bad ki kynhun bapher bapher kiba kwah ban pynkup burom ïa utei u samla halor kane ka jingjop jong u Steve ki lah ban wan lang ha katei ka sngi namar kan shem jingeh ba kin pynlong la ka jong ka prokram naba u Steve u la hap pat ban pyndep sa kawei pat ka projek kaba u la dep ban ïasoi.
Shwa kane, na ka liang ka Meisan jong u Steve, Kong B Jyrwa, ka la pynpaw ïa ka jingai khublei sha baroh kiba la kyrshan kaba borbah na ki paidbah ka jylla, kynthup ïa ka jingkyrshan met bad mynsiem da ki katto ki nongmihkhmat bad ki Myntri Sorkar ban pyntikna ïa ka jingjop jong u ha katei ka lympung ïakob shad kaba heh tam ha ka Ri hi baroh kawei.