Nongpoh, Rymphang 20: Ki bor synshar District na Ri Bhoi ki la pynbit pynbiang bha ha kaba pynlong ïa ka election MDC ha ki 5 tylli ki Constituency ha Ri Bhoi kaba sa long ha ka 21 tarik u Rymphang 2025 bad na ka liang ka bor synshar District ki la peitngor bha bad ruh la pynbiang ïa ki bor pahara khang ba kane ka election MDC 2025 kan long kaba ïaid beit ïaid ryntih ha kitei ki 5 tylli ki Constituency.
La sakhi ruh ba ki nongtrei sorkar ba la bynshet kam ha kane ka eletion MDC ha ki Polling Station bapher bapher ka Ri Bhoi, ki la ïa mih paidbah ban leit sha man la ki polling station bad ki la ïa sdang mih ruh naduh hynnin ka sngi khnang ba kin ioh ban pynkhreh janai ïa ka election ba kan long kaba ïaid beit ïaid ryntih.
Ka Additional Deputy Commissioner ka Ri Bhoi, ka Kong Balakyntiew Ranee, la ong ba kum ka bor synshar District ki la pynïaid beit pynïaid ryntih ha ka pynkhreh ïa kane ka election MDC ha kitei ki 5 tylli ki Constituency kiba don ha Ri Bhoi bad kumba long haduh mynta kane ka jingpynkhreh ka la ïaid beit ïaid ryntih khlem kino kino ki jingshah pynthud.
Ka la ïathuh ruh ba ki don 331 tylli ki Polling Stations ha Ri Bhoi, ha kaba naduh hynnin ka sngi ki nongtrei sorkar (Polling Personnels) ki la mih ban poi sha ki Polling Station ba la bynshet ïa ki bad mynta ka sngi ruh ki nongtrei sorkar ki la bteng ban leit sha ki Polling Station bapher bapher kiba don ha Ri Bhoi, na ka bynta ban long kiba la pynkhreh ban pynïaid beit pynïaid ryntih ïa kane ka election MDC.
Ka la ïathuh wat hapdeng ki jingpynkhreh ban pynïaid beit ïaid ryntih ïa kane ka election MDC ha Ri Bhoi, ki don 16 tylli ki Polling Station kiba ym don shngain bha (Vulnerable) bad 14 tylli ki Polling Station kiba don jingma (Critical) bad wat la kata ruh ka bor synshar District ki la pynbiang lypa ïa ki bor pahara khnang ba kan nym don jingthud ha kaba pynlong ïa kane ka election MDC ba ki paidbah kin jied ïa kita ki Nongmihkhmat sha ka KHADC khlem kano kano ka jingshah pynthud ne kaba ktah ïa ka shongsuk shongsain ki paidbah.
Shuh shuh, ka la ïathuh ba ha ki Polling Station kiba don ha khappud ka Assam, na ka liang u Deputy Commissioner ka Ri Bhoi u la dep ban pyntip sha ki Deputy Commissioner ba kan nym dei ban don kano kano ka jingpynthud ha kane ka election MDC bad na ka liang ka bor synshar District ruh ki la pynbiang ïa ki bor pahara ha kitei ki Shnong khappud khnang ba kan nym ktah ïa ka jingleit thep vote ki paidbah ha ki shnong khappud ka Ri Bhoi District, ka la bynrap.
