16 klur tyngka ban tei ïa ka Organic Spice Industrial Unit buh maw nongrim u CM

Nongpoh, Nailar 09: U Myntri Rangbah ka jylla u Conrad K Sangma ha ka sngi Thohdeing u la buh mawnongrim na ka bynta ban tei ïa ka Organic Spice Industrial Unit (Prime Hub) jong ka Eastern Ri Bhoi Organic Farmer Producer Company Ltd ha Bhoirymbong da ka jingangnud ban kyntiew ïa ki nongrep bad ki mar rep kum u sying, shynrai bad kiwei kiwei.
Ïa ka Organic Spice Industrial Unit la bei pisa da ka sorkar ha ka jinglut kumba T. 16 klur ka ban sa pynïaid da ka Eastern Ri Bhoi Organic Farmer Producer Company Ltd na Bhoirymbong.
Ha kane ka sngi la sakhi lang da u MLA jong ka Umroi Bah Damanbait Lamare, u Deputy Commissioner jong ka Ri-Bhoi District u u A Baranwal, ki ophisar na ka tnad ka rep ka riang bad kiwei kiwei.
Haba kren kum u kongsan u Conrad K Sangma u la ong ba ka Sorkar ka angnud ban kyntiew bad ïarap ïa ki nongrep bad don ruh ka jingthmu ban pynbun ki Food Processing Unit (FPU) haka jylla, namar lyngba kitei ki jaka saiñ ïaki mar rep kan long ka jingkyrkhu pat ban kyntiew ïa ka ïoh ka kot ki nongrep khamtam ban dang lah ban pynheh dor shuh shuh ïa ki mar rep jong ki.
U Myntri Rangbah u la pynpaw ruh ka jingsngewkmen halor ka jingurlong kane ka project ban sa tei shen ha Bhoirymbong bad ai jingïaroh ïa u MLA jong ka Umroi uba la don bynta ban pynbor ïa ka sorkar jylla ba ka thaiñ Umroi ka dei ban don kawei ka Induatrial Unit.
“Nga kloi ban ïarap ïa ki nongrep bad nga kitbok ruh ba ka Industrial Unit kan long ka jingmyntoi bad ka jingkyrkhu ïa ki nongrep ka thaiñ Umroi bad lyngba ka jingïarap jong ka Sorkar yn sa nang kyntiew ïa ka ïoh ka kot ki paidbah” la ong u Conrad Sangma.
U la ong ruh ba ka Umroi ka dei kaba biang bad kaba donkam eh ba bynta ka kam khaii ka pateng ha ka jylla hi baroh kawei, namar ka kad liengsuiñ ruh ka don ha kane ka thaiñ, ka surok ruh ka dei kaba biang, na bynta ban leh ïa ki kam khaii pateng bad khlem pep kane ka thaiñ kan long kawei jaki jaka khaii kaba heh na ka bynta ka jylla.