Shillong, Ïaïong 23 : Ka kynhun ïalehkai phutbol ki heprit jong ka Kynton U Mon ka la bteng ban khur jingjop ha ka lympung ïalehkai Under-10 ( Boys) Football league 2023 ba pynïaid da ka Shillong Sports Association (SSA). Ka Kynton U Mon ka la khur jingjop da kaba pynliem da 16-0 kol pyrshah ïa ka kynhun jong ka Summit Academy ha ka jingïalehkai kaba la long ha ka sngi Saitjaiñ ha madan Third Ground, Polo, Shillong.
Ha kane ka jingïalehkai, u heprit A. Nongspung bad u N. Bareh ki la thep mar san kol. Haba phai sha ka jingïalehkai, ka Kynton U Mon naduh kaba sdang ka la ñion tyngeh sha ka kut jong ka Summit Academy ha kaba tang ha ka jingïalehkai ba dang ïaid 1 minit u A. Nongspung u la ïoh ban thep ïa ka shi kol shuwa ba un thep pat ïa ka kol kaba ar ha ka minit ïalehkai kaba lai.
U N. Bareh u la thep ïa ka kol kaba lai ha ka minit ïalehkai ba 5, u N. Nongspung u la sdang ban thep ïa ka shi kol ha ka minit ïalehkai kaba 9. U N. Bareh u la thep ïa ki saw kol kiba bud ha ka minit ïalehkai ba 14, 16, 20 bad 45, katba u N. Nongspung u la thep ïa ki saw kol ha ka minit ïalehkai ba 22, 33, 38 bad 47.
U A.Nongspung u la ïoh ban thep biang ha ka minit ba 23 bad 33, katba u Joes Langki u la ïarap thep ar kol ha ka minit ïalehkai ba 28 bad 42. Ka SSA ka la pyntip ba ïa ki jingïalehkai ba dang sah jong kane ka lympung la hap ban pynpep noh shuwa na kadaw ka jingbym lait ka madan ïalehkai tad haduh ban da pynbna pat da kumwei.
