15 tylli ki trok ba shah thang bad 25 tylli pat kiba shahpyn julor ha ka jingjia thang kali ha Star Cement Lumshnong

Khliehriat jymmang 19: Ki khubor ba la ïoh lum ki ong ba ki la don haduh 15 tylli ki trok jong ka company Star Cement kiba la shah thang bad 25 tylli kiba shah pynjulor, shah kawang maw ha ka jingjia kaba la jia hapoh ka phyllaw jong ka kompeni Star Cement ha Lumshnong, East Jaiñtia Hills.
Katei ka jingjia ka la jia ha ka janmiet jong ka sngi U Blei kata hadien ka jingjia aksiden kali ha kaba uba ñiah ïa ka kali bolero pickup comper u la khlad noh ha shen.
Katkum ka jinglap na ki CC tv camera ba la ïoh ring la ïohi ruh ba ki katto katne ngut ki briew ki la kawang maw bad wiang ding ïa ki trok bad hadien ba ki la dep pynjulor ïa ki trok ki la leit sa sha ka Gate-II ki la shoh bad ktah kti sa ïa ki nongtrei jong ka company kiba dang pyrshang ban pynlip ïa ka ding bad ka kali pynlip ding jong ka company ruh ka la shah pynjulor.
U Addl Superintendent of Police ka East Jaiñtia Hills District lyngba u kyrwoh u pyntip ba ha katei ka janmiet sngi U Blei ki pulit ki la ïoh jingtip halor ka jingjia aksiden kali hapoh ka phyllaw jong ka Star Cement, ha kaba uwei u trai shnong u la iap hashen na ka jingshah iuh kali kaba la lam sha ka jingbitar ki paidbah trai shnong.
Kumta mardor ki bor pulit na Lumshnong PS ki la wan poi ha katei ka jaka bad la phah shuh shuh ruh ïa ki bor pulit, hadien ba la wan poi ha kane ka jaka la ïoh jingtip ba ha katei ka janmiet ka la don ka jingjia aksiden kali hajan ka shnong Wahiajer ha ka surok bah NH-6, kata hapdeng ka trok jong ka Star Cement bad kawei ka Pickup trok.
La ong ba kane ka trok ka Star Cement ba la ñiah da u Sailangmi Dkhar uba na Khliehtyrshi ka la phet krad kaba la pynlong ïa u nongñiah jong ka Pick up lem bad kiwei pat ba kin beh thong ïa kane ka trok shaduh phyllaw jong ka Star Cement.
Hadien ba la wan poi ha kane ka jaka u nongñiah jong ka Pick up uba dei ruh u trai shnong na Lumshnong, u samla Sniawbhalang Suchiang u la kiew ha katei ka trok jong ka Star Cement bad pyrshang ban kta kti ïa u nongñiah bad ha ka jingpyrshang ban phet krad uba ñiah ïa ka trok u la ñiah shakhmat ïa ka kali bad ka trok ka la ïoh ïuh ïa une u nongñiah ka Pick up uba la khlad noh hashen.
Hadien kane ka jingjia, kumba 300 ngut ki briew kiba dei na ki shnong ba marjan kiba rah da ki tiar pynmynsaw kynthup ki dieng ki maw bad kiwei pat ki la ialum lang hapoh ka phyllaw jong ka Star Cement bad sdang ban pynjulor ïa ka jaka ap pahara, ki kor CCCTV bad thombor ïa u nongap pahara, ong ki khubor pulit.
Kine ki paidbah kiba don hapdeng ka jingbitar ki la khang lynti ruh ban pynkynriah ïa ka metiap jong utei u lanot bad hadien katto katne la lah ban pynkynriah noh ïa ka met sha Civil Hospital, Khliehriat.
Tang hadien khyndiat minit, ki paidbah ki la thang noh ïa ki 15 tylli ki trok kiba pynieng bad ha kiwei pat ki bynta jong ka Star Cement, hadien kane la phah mardor ïa ka kali pynlip ding, hynrei u paidbhur u la thombor ïa ki dkhot pynlip ding jong ka Star Cement bad pyrshang ruh ban pynjulor ïa ka kali pynlip ding.
Na ka liang ki bor pulit ki la pyrshang ban pynsnangeh ïa u paidbhur uba thmu ban thang ïa kane ka kali pynlip ding bad thombor ïa ki nongap pahara, hynrei u paidbhur u la sdang ban ktah kti sa ïa ki bor pulit kiba pyrshang ban tehlakam ïa ka jinglong jingman ban ïada ïa ki mynsiem briew bad ki jingdon jingem.
Kham hadien da ka jingwan poi shuh shuh ki bor pulit la lah ban tehlakam ïa ka jinglong jingman bad ban pynpra ïa u paidbah kumjuh ban pynlip ïa ka ding kaba klang.
Na ka liang ki pulit ki la register case halor kane ka jingjia bad ka jingtohkit ka la iaid shakhmat, ong ki khubor na ki pulit.