Nongpoh, Risaw, 18: Ka Khasi Student Union (KSU), Employment and Moni-toring Cell jong ka North Khasi Hills District hapoh ka jingïalam jong u Samla Banjop Maring lem bad ki dkhot mynta ka sngi ka la leit ban ïakynduh ïa u Raja Brahma ADC ba dei ruh u Member Secretary ka Dis-trict Selection Committee ha Ri-Bhoi District hadien ba u Deputy Commissioner um don ha katei ka sngi na ka bynta ban ïakren halor ka thungkam thungjam ba ka dei ban long kaba khuid ba suba bad kam dei ban don kano kano ka jingartatien ha ka rukom thungkam.
Na ka liang ka seng ka la rah ruh 15 tylli ki mat ha katei ka sngi hakhmat u ADC ba kynthup ïa ka jingthung ïa ki Vice Chairman bad dkhot jong ka DSC ki bym don kano kano ka jingïadei bad ka saiñ hima sima, ka jingpynbna man u snem ïa ka jingdon jingem jong ki, ki samla wad kam ki dei ban long ki nongshong shnong jong ka jylla Meghalaya, ban kiar noh ka jingthung ïa ki kam kontrak/ adhoc bad casual, ban pynmih ïa ka eksam man u snem khlem da pynslem ïa ka por, ban pynpaw paidbah ïa ki marks jong ki samla wad kam, kam dei ban don ka jingkylla ha ki roll no ha ka por thungkam, ban pynbiang ïa ka carbon copy jong ka kot OMR sha ki kyrtong, ban pynlait ruh ïa ki jubab jong ki jingkylli, ban pyndep ïa ka jingthungkam hapoh 6 bnai hadien ka eksamin, ban pynduh noh ïa ka personal interview ha ka kyrdan B, C bad D, ban ai ïa ka kaiphod ba man la u snem da ka DSC, ki jingkylli ki dei ban long kiba rieh ba kin nym lait shabar, ban buh da ki kor computer ban ïakhun ïa ki eksam ha ki por ban wan.
Haba kren sha ki lad pathai khubor u Samla Banjop Maring Chairman ka Employment and Moni-toring Cell ka KSU North Khasi Hills District u la ong ba kum ka seng ka la ïoh ban kren sani bha ha katei ka sngi bad u ADC ba dei ruh u Member Secretary ka DSC Ri-Bhoi ban pynbeit ïa ka rukom thungkam thungjam bad ba ka rukom thungkam kam dei ban don kano kano ka jingartatien ïa ki samla bad ka dei ban long kaba khuid.
