15 lak yn ïarap ka tnat Art and Culture ban shna pynbha ïa ka Aitnar ha Tuberkmaishnong

By Mawphor Editor On Jul 20, 2024

Khliehriat, Naitung, 19: Ka jingleh niam Behdeiñkhlam jong ka Seiñ Raij Tuber la pynkut ha ka sngi Thohieng ha ka rukom ba iphuh iphieng bha, ryngkat ka kynhoi ka risa da ka jingkmen, ïa kane ka jingleh niam la ju pynlong man la u snem halor ka jingngeit ba kane ka lehniam kan behnoh sha jngai ïa ka khlam, ïa ka pang ka shitom, ïa ka sniew ka smeh baroh.
Ha kane ka sngi, u Myntri ka Sorkar Jylla u Bah Paul Lyngdoh u la long kum u kongsan bad u la kular bad pynbna ruh ba ka tnat Art and Culture jong ka Sorkar Jylla kan ai jingiarap T.15 lak na ka bynta ban pynbha shuh shuh ïa kane ka jaka lehniam, ka Aitnar ha Tuberkmaishnong.
U la kyntu ruh ïa ki nongialam bad ki dkhot jong ka Seiñ Raij Tuber ba kin wan ban ïakynduh ïa u ban iakren halor kane.
U la ong ba da ka jingiatreilang lehse ha u snem u ban wan baroh ki paidbah kiba wan sha kane ka jinglehniam kin ioh ban rung lut baroh shapoh kane ka lympung. U la kular ruh ba ka tnat kan kyrshan ruh ban shna shuh ïa ki jaka shong bad kane kan iarap ïa ki paidbah kiba wan sha kane ka lympung bad ïa kiwei kiwei ruh kiba wan na kiwei pat ki jylla kin ioh ban wan ban sakhi lang ïa kane ka jinglehniam bad kin iohi ruh ïa ka jingriewspah jong ka kolshor u Hynñiewtrep Hynñiew basa.
Shuh shuh u la ong ba kane ka jinglehniam kan beh noh ïa kiei kiei kiba sniew baroh bad khot ïa ki bor jong ka jingbha. U la bynrap ruh, “kane ka dei ka por jong ka jingrakhe kumjuh ruh kane ka dei ka jinglehniam ka ba pyni sha ka pyrthei ba ngi don la ka riti ka dustur ba kum ka sorkar ruh ka dei ban nang pynbha ban pynkyntiew bad nang pynjanai,”u la ong.
U Bah Kyrmen Shylla uba la long kum u Symbud Kongsan u la ai ka jingkhubleit Behdeiñkhlam ïa baroh ki khun ki hajar jong ka Seiñ Raij Tuber bad u la pynpaw ruh ka jingsngewkmen ba baroh ki nongkitkam bad ki dkhot jong ka Seiñ Raij ki don ka jingiasngewthuh jingmut, ka jingiatylli, ka jingiaieid bad ka jingiatreilang na ka bynta ka bha ka miat.
“Na ka liang ka Seiñ Raij ka ladep pynsngew ha nga shibun ki jingdonkam lyngba ki dorkhas bad nga sngewkmen ba u Bah Paul u la wan lang ha kane ka sngi bad ma nga kum u nongmihkhmat ryngkat lang bad ka Seiñ Raij ngin ïa iaid lynti lang khnang ba ki kam kiba dang sah kin iaid beit iaid rynti khnang ba kan long ka jingmyntoi ïa baroh lang,” ong u Bah Shylla.
U President ka Seiñ Raij Tuber, u la ai khublei ïa u Bah Paul Lyngdoh kumjuh ruh ïa u Bah Kyrmen Shylla kiba la iarap ïa ka Seiñ Raij, u ai khublei ruh ïa baroh kynthup ki khun ki hajar jong ka Seiñ Raij kiba la wan sha kane ka jinglehniam.
Ha ka lympung ha ka Biar Aitnar, ki la poi haduh 68 tylli ki rod na ki Seiñ Raij Shnong bapher bapher kiba hap hapoh ka Sien Raij Tuber, ha ki rod ba pynshad ha lympung ki la don ki jingthoh kiba don jingmut kum ka jingthoh ba ong “No Smoking” bad kiwei kiwei bad hadien ka shad ka mastieh ha lympung ka la don ka jingiatan ïa u Bhang ha kaba ka phang neng ka la jop ïa ka phang wah bad kane ka jingjop ka phang neng ka pyni ïa ka dak ban kan don ka bha ka miat, kan bha ka thung ka tep, ka wanrah ïa ka koit ka khiah, kan bha ruh ha ka kamai kajih, hadien kane ïa ki rod la leit bret noh sha ka jaka ba la pynkhreh.
La wan sakhi ïa kane ka Behdeiñkhlam da ka MLA Sutnga Saipung ka kong Santa Mary Shylla, u MLA jong ka North Shillong Bah Adelbert Nongrum, ki MDC na ri lum Jaintia, u Dolloi Elaka Jowai, u Puramon Kynjing, u Deputy Commissioner ka East Jaiñtia Hills District u Shivansh Awasthi, IAS, u Superintendent of Police ka East Jaiñtia Hills District u Giri Prasad u Superintendent of Police West Jaiñtia Hills District Bah C. Shyrti, u Waheh Shnong Tuber Kmaishnong, Bah Miki Lyngdoh bad kiwei kiwei.