Tura,Jymmang 20 : Uwei u briew uba kyrteng u Sadam Hussain bad uba donkti ban leh beijot ïa kawei ka khynnah na West Garo Hills ula shah rai pynrem ha ka Special POCSO Court da kaba hukum ban set phatok ïa u 14 snem ryngkat ka kuna T.10000.
Ha ka jingtian bishar ïa katei ka jingjia kaba la jia 5 snem mynshwa, khatduh khatwai mynta ka taiew, ka POCSO Court kala rai ïa katei ka jingpynsajia ïa u Saddam Hussain uba na Pushkunipara, Bholarbhita kaba don ha ka thaiñ Phulbari jongka West Garo Hills uba la leh be-ijot ïa kawei ka khynnah rit katba ka dang leit ïalehkai ha kawei ka madan bad la ki paralok ha ka 23 tarik u Jymmang 2018.
Hadien ka jingtohkit kaba bniah da ka sub inspector ka Sildha N Marak la lah ban pynngat ïa ki kam bymman ha ka 31 tarik u Nailar 2018.
Haba ka jingtian bishar kala poi noh sha kaba kut, ka ïingbishar jongka special judge POCSO kala shem ba u Saddam ula leh ïa katei ka kam runar bad ka la rai ban pynshitom ïa u kat kum ki kyndon aiñ. Hadien kane ka jingrai pynrem ka ïing bishar ka la rai ruh ban set ïa une u bymman haduh 14 snem bad ka kuna T.10,000.
Lada jia ba une uba la shah rai pynrem ym siew ïa katei ka kuna yn shah set hapoh phatok sa 3 bnai la pynbna ka POCSO Court, Tura.
