Nongstoiñ, Nailur, 15: Ka long kaei kaei kaba pynlyngngoh ïa ki paitbah ha West Khasi Hills ha kine ki sngi, namar ka jingkiew kynsan jong ka bai ring bording haduh khatsaw hajar tyngka kawei ïa ki longïing kiba dang sdang ban ring thymmai.
U bah W.Thongni ha ka jingïakynduh bad u nongthoh khubor, u la ong ba dang ha kine ki khyndiat sngi, u dang wanphai na ophis ka MECL Nongstoiñ Division ba u wan ban leit pynïarap ban thep deposit ban ring bording ïa kawei ka longïing hapoh shnong. Hynrei haba u la kylli ïa ka jinglut jingsep ha kaba ring bor ding kawei na ki nongtrei ha katei ka ophis ka la ong ba baroh ka jinglut jingsep ka long khatsaw hajar tyngka.
U bah thongni u la ong ba ha katei ka por u la lyngngoh ngaiñ namar um shym poi pyrkhat ba kan kiew kynsan haduh katne, namar ha ki snem ba la dep lada dei ki ïing kiba pyndonkam saw haduh san point, ka jinglut ka dang long tang kunba saw haduh san hajar kata naduh ka bai wiring, ka bai meter bad kiwei kiwei hynrei mynta ka la kiew palat ïa ka mar shiteng.
U la ong ruh ba haba u la pyrkhat shiphang u la sngew kut lad, namar ban thep ïa katei ka deposit um sngew nud namar ka pisa ba ka tei ka trai ïing ruh kam dap kumta u la hap ban wan phai thylli noh.
Haba pyrshang ban wad jingtip ha kaba ïadei bad katei ka jingkiew dor kynsan ka bai ring bor ding, ym shym la ïoh ïa ki jingtip ba thikna. Hynrei ki don ki riew paitbah kiba ong ba katei ka jingkiew dor kynsan, ka dei ka jingshim kabu jong ki nongtrei ha ka ophis MECL, namar ha kine ki sngi ki dang pynlong jingïakhih. Hynrei haba kylli pat kaei ka daw kaba ki pynlong jingïakhih ki ong ba kim lah ban tip ïa kata. Haba phai pat sha ka jingtreikam jong ka MECL ha West Khasi Hills ka jingtrei kam kaba dkoh bha ha kaba ïadei bad ka jingpynbiang bording ha kylleng ki jaka. La lap ruh ba ki don ki shnong ki thaw shi sien ba la duh bor ding ka shim por da ki taïew ban ki bnai haduh ba kin da ïoh biang ïa ka bording.
Ka jingdkoh treikam jong ka MECL ka buh ïa ki paitbah ha ka jingeh kaba khraw, khamtam ha ki bnai ba ki khynnah skul ki la jan long Exam, namar ha kine ki snem ka umphniang sharak ruh ym ïoh shuh la kadei ka sharak reshon ne da kaba thied na ïew na hat. Dei na kane ka daw ba lada ka MECL kam lah ban pynbiang thikna ïa ka bording ka wanrah jingeh ïa ki paitbah.
