Ngi ju ioh sngewbha ïa ka ktien kaba ong “Ai te yn sa ai pat haphi” (Lukas 6:38) bad dei halor kane ka nongrim ba ngi ïohi ba la pynshlur shibun eh ïa baroh, bad bun ki pyrshang ban leh ïa kane ka kam babha naduh ki khristan bad kiwei pat ki jait jingngiet, ki Hindu, ki Muslim bad kiwei pat ki niam jong ka pyrthei. Kiwei ki niam lei ki da don da ka sngi ba ki la buh kyrpang ban leh ïa ki jingai isynei sha kiwei pat kiba duk ba toi bad khamtam kito ki khrong. Ka long shisha ka jingkyrkhu na ka bynta kito kiba kutlad ban ïoh ïa ka jingiarap na ki para briew kiba synei ïa ki lyngba ka pisa, ki jain ki nep ka bam ka dih bad kiwei pat ki jingdonkam. Hynrei ka don kawei ka jingong kaba ong “Lada ngi ai dohkha ia u briew ngi bsa ia u tang shi sngi ne ar sngi, hynrei lada ngi hikai ïa ki ban khwai dohkha ngi bsa ïa ki shi jingim”
Ka long kaba shisha ngin ym lah ban ïai ai sah ne leh synei sah ïa ki juh u briew ha ki por baroh namar kine ki jingai ki don u pud bad kham ñiar eh ba kata ka jingai kan lah ban wanrah ï jingkylla ha ka jingim jong jong kiba bun. Hynrei ka long sngewtynnad haduh katta katta ban ïohi ba ki don shibun ki riew shimet, ki kynhun ne ki seng khaïi bapher bapher kiba ïai trei ban ïarap kyrpang ïa kito kiba donkam na ka por sha ka por. Don napdeng jong ki kiba ai na ka bynta ban ïoh burom sha lade hi ki don pat kiba ai na ka daw ba ki isynei bad kim ju khmih lynti ban ïoh ïaka bainong da kaba shim ka burom sha lade. Kumjuh ruh kum ki kmie ki kpa kat kum ka jingbuh beit buh ryntih jong U Blei, ngi lah ban ai ïa ka jingim sha ki khun jong ngi, da kaba lyngba ka poi kha poi man ngi kha ïa ki khun jong ngi sha kane ka pyrthei. Kane ka dei ka jingai jong ka jingim ha ka doh bad kam kut tang katta hynrei kum ki kmie ki kpa baroh ka jingim jong ngi ka long beit na ka bynta ki khun. Ka ktien U Blei kat kum ka Salm 127: 3-4 ka ong “…ki khun ki long ka jingioh kynti U Trai: bad u soh jong ka kpoh u long ka bainong.. bad ki long kum ki khnam ha ka kti u ba khlaiñ bor….” kumta ki khun ki long shisha ka lawei jong ki kmie ki kpa bad ka lawei jong kata ka longiing hi. Kumta ki kmie ki kpa kim ju tyngkai ei ei ruh naka bynta ban ai ïa kata kaba donkam sha la ki jong ki khun.
Hooid baroh ki jingai bad ki jingpyrshang ki long kiba myntoi na ka bynta ki khun. Ka jingpyrshang ban ïarap ia kiba duk ba toi ka long kum ka dohnud jong ki kmie ki kpa kaba kwah ban ai ei ei kaba bha sha la ki jong ki khun ki kti. Ki kmie ki kpa kiba bit ba biang ki kwah ban pynïoh ïa ka iing ka sem kaba biang bad ka jaka sah kaba biang sha baroh ki khun jong ki. Kumjuh ruh ka jingiarap ban pynioh ïa ki iing bad jaka shong kumtei ka long ka kam kaba don ïa ka dohnud jong kata ka jinglong kmie jinglong kpa ka kwah ban ai ia ki jingai babha ka wan na ka dohnud jong u Blei hi kumba ka ktien ka ong ka khambha ban ai ban ïa kaba shim.
Hynrei kitei ki jingai baroh ki don ïa u pud bad ki long tang na ka bynta ka jingim doh ha kane ka pyrthei, bad lada kito kiba ïoh pdiang ki sngewthuh ïa ka jingkyrkhu kan iarap ïa ki ban ïoh ïa ka jingim kaba lam sha ka akor kaba bha bad ruh ka jingiadei kaba jan bad U Blei. Hynrei ngim lah ban len ïa ka jinghisha bad ka jingai babha tam ka dei ka jingai ïa ka jinghikai babha ïa ka akor ka burom bad ia ka jingngeit kaba lah ban kyrshan bor sha ka jingim kaba jop bad kaba hok. Kawei kaba long shisha kaba eh ban ai bynta sha kiwei pat ka dei kata ka akor ka burom ne ka jinghikai sha ka jinglong riew Blei. Ngi ïohi bad sakhi ba wat la ki kmie ki kpa ki pyrshang ban ai ïa kaba bha tam hynrei lada na lade kim don ia kata ka jinglong riew Blei kumno pat keiñ kin ai pateng ïa kata sha la ki jong ki khun ki kti. Ngi ïohi ba kam long kaba eh ban ai ïa ki jingdonkam ba kynja doh jong ki khun jong ki, hynrei kumno shaphang kata kaba kynja mynsiem pat keiñ. Ha kawei ka jingjia u kpa jong ka ïing u long u briew uba la pdiang ïa ka jingngeit, hynrei na kaei kaba paw shabar la ïohi ba ha lade hi um don ia kata ka jingngeit, namar ba um shym la lah ban aibynta lang ïa kata kaba kordor eh sha ki khun ki kti jong u. Kine ki khun baroh ki don shabar jong kata kaei kaei kaba kordor bad kata ka dei ka jingngeit, ba haduh ka sngi jong ka jingkhlad noh jong u. Ka long shisha kaba khia ba kumno keiñ ngin ai bynta ïa kata kaba ngim don halade naduh napoh jong ka jingim jong ngi.