Mawkyrwat, Risaw 10: U Deputy Commissioner jong ka South West Khasi Hills District u la ai ka jingpynbna paidbah ba ka District Disaster Management Authority (DDMA) ryngkat ka jingïasnohkti lang bad ka State Disaster Management Authority (SDMA) kan pynlong ïa ka Mock Drill halor u Jumai bad ka jingtwa khyndew ha baroh kawei ka jylla kynthup ïa ka Mawkyrwat kata ha ka 12 tarik u Risaw, 2023.
Ïa kane ka Mock Drill ha ki katto katne ki jaka kata ha Mini Secretariat, ha Civil Hospital Mawkyrwat, ha Nativity Higher Secondary School Mawkyrwat, ha Ïew Mawkyrwat, ha ki ophis sorkar bad ha Laitlawsang.
Shuh shuh la bthah ruh ba ha kaba ïadei bad kane ka Mock Drill kan don ka jingpyrthuh bud ban pyni kumno ka Incident Response Team jong ka distrik ka treikam ban ïarap ïa ki lanot kiba shah ktah na ka jingwan lynshop ha u Jumai.
