Mawkyrwat, ‘Nailar 27: Ka long kaei kaei kaba sngewsih lada pyrkhat haba ïa kaba la don hynrei la shim noh, ha kaba kawei ka jia ha ka shnong Domtynrong, South West Khasi Hills District kaba la duh noh ïa u khaw reshon ba ka ju ïoh kumba kiwei ki shnong ki ïoh mynta la 13 snem kynthih.
U Myntri Shnong jong ka Domtynrong u Bah Batjuban Snaitang ha ka jingïakren bad ki lad pathai khubor u la ong ba naduh ba la seng ïa kane ka shnong ha u snem 1960 haduh u snem 2011 ki ju ïoh beit ïa u khaw reshon, hynrei naduh u snem 2011 sha jrong kane ka shnong ka la shah pynduh noh ïa u khaw reshon haduh mynta kaba ym shym la tip na kaei ka daw kaba ki la shah pynduh noh ïa une u khaw.
“Kiwei kiwei ki skhim sorkar kum ki skhim jong ka sorkar jylla lane ki shkim jong ka sorkar India ki ïaid beit ki ïaid ryntih kim don kano kano ka jingthud hynrei lait noh tang u khaw rashon kim shem la ïoh shuh”, ong u Myntri Shnong.
U la ong ruh ba kumba 55 tylli ki longïing ki don ha kane ka shnong bad 90% na kine ki longïing ki dei briew kiba shu rep kyndoi ja kpoh da kaba rep synsar, kwai, tympew bad ki sohmrit, ha kaba ka jinghiar dor jong u synsar ka la buh jingeh shikatdei ïa kine ki nongshong shnong namar ba ïa u khaw rashon ruh kim ïoh shuh.
U Myntri Shnong u la ïathuh ba la bunsien ki la pyrshang ban ïa kren ha kaba ïadei bad u khaw reshon hynrei kam shym poi shano shano haduh mynta.
Kumta ki paidbah nongshong shnong jong ka shnong Domtynrong bad kumjuh u Myntri mynta ki la phaikhmat sha ki nongmihkhmat da kaba kyrpad ba kin ïarap lem ban leit pynsngewlem ha ki bor ba dei peit khnang ki paidbah jong ka shnong Domtynrong kin ïoh biang ïa u khaw reshon.
