10 tylli ki Wheelchair, 6 tylli ki Sanitary Pads Vending Machine bad ka CMWAS sam ka DSWO & DSHEW

Mawkyrwat, ‘Nailur 30: Ka ophis District Social Welfare Office (DSWO), South West Khasi Hills District ryngkat ka District Sankalp Hub for Empowerment of Women (DSHEW), South West Khasi Hills District ha ka sngi Baar ki la sam ïa ki Sanitary Pads Vending Machine, ki Wheelchair, bad ki CM Wedding Assistant Schemes ha ka jingïalang ba la pynlong ophis DC, Laitlawsang, South West Khasi Hills District.
Lah ban kdew ba ïa ki Sanitary Pads Vending Machine la sam sha ki 6 tylli ki skul, ki Wheelchair sha ki 10 ngut bad ïa ka CM Wedding Assistant Schemes sha ki shijur kiba dei ki khunswet kiba la pyndep ruh ïa ka jingkyntiew kurim.
U , Assistant Commissioner jong ka South West Khasi Hills District Bah C. Kassar uba la long kum u kongsan ha ka jingkren u la ai mynsiem na ka bynta ki nongwan sha ka jingïalang la ka long ïa ki shynrang ne kynthei ba kin don ka jingïalang ban pyntyllun ïa ki kam ha ka imlang ka sahlang.
U la ong ruh ba ma ngi iwei pa iwei ngim dei ban don ka mynsiem jong ka jing-i-beiñ ne ñiew beiñ ïa ki khun kynthei hynrei ngi dei ban ieit bad sumar ïa ha ki por baroh.
Haba kren halor ki tiar ba la sam sha ki, kata naduh ki Sanitary Pads Vending Machine bad ki Wheelchair ula kyntu ba ki ïa ki, ki dei ban donkam hok ha ka rukom kaba dei kum ka mar la jong katkum ka jingdonkam bad ym tang kata da sumar khuid ruh ïa ki khnang ba kin neh slem.
Namarkata, haba kren ai mynsiem ïa baroh kiba wan ha ka jingïalang bad ïa kiwei de, u bah C. Kassar, MCS u la ong ba haba ïoh ki jinghikai ngim dei ban buh kano ka mynsiem jong ka jingïakdew kti, kren beiñ ïa ki khun kynthei, bad dei ruh ban pyrkhat na ka bynta ka jingkoit jingkhiah jong ki khun kynthei khnang ba ka imlang ka sahlang ruh kan koit ka khiah.
Ka kong Matilda Kharkongngor, Gender Specialist, State Hub for Empowerment of Women, Shillong kum ka symbud kongsan ha ka jingkren jong ka la ïathuh ïa ki katto katne ki bynta bad ki kam ba kum ka ophis ka treikam ha ka ban ai jingïarap ïa ki khun kynthei kiba shem bad kynduh jingeh ha ka imlang ka sahlang. Ym tang kata, ka la batai ruh halor ki jingtreikam jong ki tnad ophis kiba don hapoh jong ka State Hub for Empowerment of Women kata naduh ka ‘Mission Shakti Scheme’, u Helpline Number 181, ka One Stop Centre (OSC), ka Beti Bachao Beti Padhao (BBBP) khnang ba ki paidbah kin shim kabu bad pyndonkam katkum ka jingdawa jong ka kam bad jingïakynduh jong ki kynthei ha ka jingim.
Ha kane ka sngi la ïoh ruh ka jingrwai kyrpang na ki khynnah skul jong ka Little Star Higher Secondary School, Mawkyrwat.
Ïa ka jingïalang la pynïaid da u bah E. Tariang, District Social Welfare Officer jong ka South West Khasi Hills District, ka jingkren pdiang na ka kong Evary Lyngkhoi, District Mission Co-ordinator, DHEW jong ka South West Khasi Hills District bad jingkren khublei na u bah Mebanshai Diengdoh, Unique Disability ID (UDID) In-charge jong ka South West Khasi Hills District, Mawkyrwat.