Shillong, K’lyngkot, 03: Ka Hynñiewtrep Youth Council (HYC) bad ka North Eastern Hill University Students Union (NEHUSU) ha ka sngi Balang ki la aipor 10 sngi ïa ka Sorkar Jylla ba kan pyllait noh ïa ka baibam ne Scholarship jong ki samla pule na ka bynta u snem 2022-23.
Ha ka jingïakren bad ki lad pathai khubor ha ka jingpynlong ïa ka jingïakhih hakhmat ka ophis treikam jong ka MBoSE ha nongbah Shillong, u General Secretary jong ka NEHUSU u samla Banpynbiang Riang u la ong ba ki bun ki samla pule hapoh ka jylla kiba shu shaniah beit ban siew ïa ka bai pule na ka Scholarship kaba ki ïoh shisien shi snem ban pyndep ïa ki jingpule jong ki.
U Samla Riang u la ong ba ka jingpynslem jong ka Sorkar ban pyllait ïa ka Scholarship ka la pyndiaw mynsiem haduh katta katta ïa ki samla pule kiba wan na ki longing kiba duk bad kiba kham duna ka ïoh ka kot, khamtam eh ïa ki samla pule kiba wan na ki thaiñ nongkyndong.
U la bynrap ba kane ka jingïakhih kaba malu mala ka long tang ban shu phah ïa u kyrwoh uba shai sha ka Sorkar Jylla ha kaba ïadei bad ka jingbym pyllait ka Sorkar ïa ka Scholarship jong ki samla pule.
“Kiba dang shu aplai thymmai bad ki samla pule ba mynta kim pat ïoh ïa ka Scholarship na ka bynta u snem pule 2023 bad dei na kata ka daw ba ngi la aipor 10 sngi ïa ka Sorkar ba kan pyllait noh ïa ka Scholarship jong ngi hynrei lym kumta ngin mih paidbah sha surok,” la ong u Samla Riang.
Haba ai jingkyrshan ïa ki samla pule, u President ka HYC u Bah Roykurpar Synrem u la ong, “dang shen u Myntri ka tnat Pule Puthi u la kular sha ki samla pule ba kin sa ïoh ïa ka Scholarship hapoh ar ne lai taiew hynrei kaba sngewsih ka long ba la dap lai bnai, ki samla pule kim shym la ïoh ïa ka Scholarship.
U Bah Synrem u la kyntu ïa ka Sorkar ba kan nang siew shwa na ka Contingency Fund ïa ka Scholarship sha ki samla pule.
“Lada ka Sorkar ka la lah ban ai jingïarap T. 1 klur na ka Chief Minister Relief Funds sha ki lanot lynshop mariang ha ka jylla Sikkim, balei pat kam lah ban pyndonkam da ka pisa na ka Contingency Fund ban pyllait ïa ka Scholarship kaba dang sah pongding haduh mynta,” la buh jingkylli u Bah Synrem.
U la ong, ba ka HYC kan dang ïai bteng ban ai jingkyrshan ïa ka NEHUSU bad ïa baroh ki samla pule bad lada ka Sorkar kam leh eiei hapoh ka por ba la buh, ka Seng kan kyrshan met bad mynsiem ïa ka rai bad ïa ki jingïakhih ban pynlong da ka NEHUSU.
