10 snem mynshwa ki Pnar ki shah pyntriem ha ki lehnoh Karbi, mynta sa ha ka KSA

Shillong, K’lyngkot, 07: Ki nongïalam jong ka Hynñiewtrep Border Disputed Redressal Forum ha ka sngi Baar ki la ujor sha ka Meghalaya Human Rights Commission, (MHRC) Shillong halor ka jingshah thombor ki paidbah nongshong shnong Khasi Pnar kiba shong ba sah ha ka thaiñ Block-1 kaba don ha khappud bad ka jylla Assam.

Ha ka jingïakren bad ki lad pathai khubor u Chairman jong ka Forum u Bah Chandame Sungoh u la ïathuh ba ki lai tylli ki mat kiba ka Fourm ka la thoh sha ka MHRC ki long ha kaba ïadei bad ka jingshah knieh noh ki jaka ki puta ha ka Sorkar Assam ha ka por ba la thaw ïa ka Autonomous District Council ha u snem 1952.

Ka Elaka Labang-Nongphyllut kaba la tip paidbah kum ka Block-1 kaba dei ka jaka jong ki Pnar naduh hyndai hynthai hynrei la pynhap jubor noh shapoh Karbi Anglong Autonomus Council (KAAC) naduh ka por ba la thaw ïa ka District Council ha ki snem ba mynshwa, la ïathuh u Bah Sungoh.

“Ngi la ujor ruh halor ka jingshah lehbeiñ ha kiba bun ki liang naduh ba la pynhap jubor sha ka Karbi Anglong Autonomous Council jong ka jylla Assam, ki paid Khasi-Pnar kiba shong basah ha kane ka jaka ki la im kum ki mrad ha kaba ym shym la don shuh ba kheiñ briew ïa ki.  Naduh u snem 1997, 1998 bad haduh u snem 2016 hapdeng kine ki snem ka jingim jong ki briew jong ngi kiba shong basah ha kitei ki thaiñ ka long kaba i kordit shisha haduh katta katta da ka jingmih ki kaikhlaw Karbi kiba tip kum ka Karbi National Volunteer (KNV) Karbi People Liberation Tigers (KPLT) Karbi Longri Raikom Asong (KLRA) United People Democratic Solidarity (UPDS) bad kiwei kiwei hapoh kine ki 10 snem bad 15 snem.  Ki paidbah ki shem jingeh haduh katta katta namar ïa ka hok longbriew manbriew la iuhroit da kine ki kaikhlaw ki la dawa manla kawei pa kawei ka thliewiing jong ki Khasi-Pnar ba ki hap ban siew ïa ka bai khajna na ka iing, na ki lyngkha, ki jingri jingdub bad kiwei kiwei ki jingdon jingem sha ki kynhun seng lehnoh. Kine ki seng lehnoh ki rung sha ki shnong ki thaw bad ki leh donbor da kaba pynïap ïa ki jingri jingdub bad ki kynthei ki khynnah ki shah leh be-ijot bad nalor kata la pyntieng pynsmiej ïa ki paidbah nong shnong shnong,” la ïathuh u Bah Sungoh.

“Kaba mat kaba lai ba ngi la ujor ka long halor ka jingbym ïoh ïa ki song pynroi  namar kumba ka long mynta baroh ki paidbah nongshnong shong ka ri India ki la ïoh ïa ki surok, ka  umbam umdih, ki skul, ki jaka sumar ba biang bad kiwei kiwei ki kam pynroi hynrei ki paidbah kiba sah ha ki thaiñ khappud kiba don haduh 27  lane 28 tylli ki shnong kim ïoh satia ïa ki kam pynroi bad ki sahdien haduh katta katta.  Ki paidbah ki mad ïa ka jingeh bad ki im kordit haduh katta katta. Dei na kane ka daw ba ngi la hap ban pynsngew sha ka Human Right Commission kan shimkhia ïa kane ka kam bad ngi don ruh ka jingkyrmen ba ngin ïoh ïa ka hok ka jong ngi,” la pynpaw u Chairman ka HBDRF.

Shuh shuh u la ïathuh ba ka Forum ka la ujor halor ka jingjia dang khyndiat sngi hadien ba la ïoh jingtip ba ki nongïalam jong ka Karbi Student’sAssociation (KSA) ki la leit sha ka shnong Lapangap ban pynbor ïa ki Khasi-Pnar ba kin rejistar noh ïa ki lyngkha rep kba jong sha ka Karbi Anglong Autonomous Council  (KAAC) jong ka jylla Assam bad ban siew ruh ïa ka khajna.

U nongaiktien jong ka Forum u Bah Thomas Passah u la ong kum ka kynhun ka la leit jngoh bunsien ïa ki paidbah ha ka thaiñ Block-1 ban sngap ïa ki jingeh ba ki mad.

“Wat hapdeng ka jingïakren pynbeit pud ngi ïohi ba ka dang don pat ka jingpynibor na ka liang jong ki Karbi ban phah register ïa ka khyndew ka shyiap sha ka KAAC bad ban siew ruh wa ïa ka khajna. Lada don shisha kata ka jingïapynbeit pud kam dei shuh ban don kum kine ki jait jingpynbor bad ngi shaniah ha ka Human Rights Commission ban tuklar ïa kine ki jingeh jong ki paidbah ha khappud,” u la ong.

U la pyntip ruh ba ka MHRC kan khot ïa ka jingpynsngew ïa ki nongïalam jong ka Forum bad ong ruh lada donkam ka Forum kan sa ïalam lang ïa ki nongshong shnong kiba sah ha ka thaiñ Block-1 ban ai sakhi ïa ki jingjia kiba bun khnang ba ka Commission kan dup rah ïa kane ka mat sha ka National Human Rights Commission bad yn dup lah ban weng noh ïa ki jingeh jong ki paidbah.