10 percent ïa kiba duk ha ka RP, ai jingmut u Bah K.L.Pariat sha ka Expert Committee

Khliehriat, Jylliew, 23: U Bah Khroo L. Pariat uwei na ki nongtrei monsngewbha na West Jaiñtia Hills District u la thoh sha ka Expert Committee da kaba ai jingmut ban ai bhah 10 percent ïa ki longïing baduk ba jynjar kiba shu bylla sngi, kiba trei ha ki shkim sorkar bad kiba rep ba riang kiba dang duna ha ka ïoh ka kot.
Ha kaba ïadei bad ka thungkam thungjam, u Bah Pariat u la ong, ki briew kiba trei hapoh ki shkim ne ki kam jong ka SSA, kiba hikai ha ki skul RMSA kumjuh ruh kito kiba trei ha ki shkim jong ka NHM, ASHA, Anganwadi, ki Helper, ki Cook hapoh ka PM Poshan, kiba trei ha ki ïing ki sem kiba shong die dukan ha surok ki dei ban ïoh la ka bhah ha ka thungkam thungjam ha ka Reservation Policy.
U la ong ba kiba kum kine ki briew kiba duk ba shitom ki don bun bha ha rilum Khasi, Jaiñtia bad rilum Garo kiba dang duna shisha ha ka ïoh ka kot bad ki dei kiba dang tlot bor shisha kumta ki dei ban don ka bhah ba kyrpang ïa ki ha ka Reservation Policy.
Ïa kiba kum kine ki briew ki donkam ban ïoh ka lad ïohkam ymtang ha ki kam Sorkar hynrei wat ha ki karkhana jong ka Sorkar ruh, u la ong.
U Bah Pariat u la pynpaw, ba ka daw ka jingbym ïohkam kiba duk watla ki dei kiba stad ka long namarba kim ïoh lad ban thied ïa ki kot ki sla, kim ïohlad ban leit ïa ki Coaching Class, kumta kim lah ban ïoh ne kynjoh ïa ki kyrdan kiba heh bad kane ka jingbym ïohlad ka kylla long ka jingkhanglad ïa ki ha ka ïohkam ïohjam.