10 lak pynïoh u MDC ïa ka Balang Presbyterian Sakwang ban shna Multipurpose Hall
Mawkyrwat, K’lyngkot, 15: U MDC jong ka Mawkyrwat Constituency, u bah Carness Sohshang ha ka sngi saitjaiñ jong ka taïew u la ïoh ban plie bad aiti syndon ïa ka work order kaba T. 10 lak tyngka ban shna ïa ka Multipurpose Hall jong ka Balang Presbyterian Sakwang, South West Khasi Hills District.
Kane ka jingaiti jong u ïa ka work order, ka long kum shibynta jong ka jingpynkhreh jong ka Balang na ka bynta ka Jingïaseng jong ka KJP Synod Sepngi ka ban sa long ha u snem 2025 bad kane ka dei lyngba ka MP skhim jong u Ma Vincent H. Pala, u MP na ka party Congress jong ka Shillong Constituency.
Lah ban kdew ba ha kajuh ka sngi, u bah Carnes Sohshang u la ïoh ruh ban plie pyrda noh ïa kawei ka ïing jong ka Balang Presbyterian Sakwang kaba la dep ban shna kaba la kot T. 3 lak tyngka ba la ïoh jingïarap napoh jong ka Khasi Hills Autonomous District Council (KHADC) jong u snem 2019-2020 ha kaba kane ka jingtei ïa kane ka ïing kaba kham phylla kaba long ban pynneh pynsah katkum ka juk ba mynhyndai (Heritage) ba ki la tei tang da maw ba la oh shrong kaba ki la pyndonkam katkum ka juk u hyndai hynthai.
U bah Carness Sohshang haba kren ha ka jingïalang, u la pynpaw ka jingsngewnguh ïa ka Balang Presbyterian Sakwang kaba la pdiang sngewbha ïa u ha kum kane ka sngi kaba kyrpang bad kaba long ruh ka sngi jong ka jingkyrkhu ba lyngba ka jingdon ryngkat jong U Blei Trai Kynrad ngin ïaid ruh ïa une u snem uba thymmai ha ka jingsuk jingkmen.
U long ruh ba ka jingwan jong ka Jingïaseng Synod kan long ka jingkyrkhu ym tang ïa ka Balang Presbyterian Sakwang hynrei ïa ka shnong ka thaw hi baroh kawei. Kumta u la ai ka jingkyrkhu kyrdoh, ba ai ba kane ka jingpynkhreh jong ki ïa kane ka jingïaseng kan long kaba ïaid beit ïaid ryntih ryngkat ka jingkyrkhu ki jong U Blei.
Ha shwa ban plie ïa ka ïing (Heritage) la pynlong ka jingïalang ba lyngkot ha phyllaw jong Ïingmane ka Balang Presbyterian Sakwang ha kaba la ïoh ruh ka jingkren na u Pastor S.I. Iawphniaw, ka jingduwai na u Tymmen Basan I.S. Ramsiej ha ryngkat da ka jingïadon lang ki Pastor, ki Dkhot jong ka Committee Balang Presbyterian Sakwang, u Myntri bad ki paidbah kiba la wan ban sakhi lang ha kane ka sngi.