Shillong, Naiwieng, 25: Ki Pulit jong ka North Garo Hills District ha ka sngi u Blei ki la ïoh ban kurup haduh 10 byrni ka dawai jyrhoh na kawei ka kali kaba la kit tuh da ki briew kiba dei na ka jylla Assam.
Ha u kyrwoh ba la phah da u Superintendent of Police ka North Garo Hills u Pawar Swapnil Vasantrao u la pyntip ba ha ka por kumba 3:40 baje ka kynhun na Rari OGC ka la ïohbat ïa kawei ka kali ba la suba ba ka dei kaba kit tuh ïa ki tiar be-aiñ bad ha ka jingkhynra ïa ka kali da kaba bud ruh ïa ki kyndon jong ka NDPS Act la ïoh kurup ka dawai jyrhoh Cough Syrup (Phensedyl) 10 byrni ba la thep ha ki 10 tylli ki song barit bad 25 bilor ha kawei ka song.
Ka dawai jyrwoh ba la ïoh kurup ka long baroh 2500 bilor bad ki Pulit ki kurup ruh ïa ki mobile phone, ka kali Tata Magic kaba don ïa u nombar AS18-AC-6853 bad ïa u shabi kali .
Halor kane, lai ngut ki briew kiba donkti kiba dei na ka jylla Assam ki la shah kem bad ha kajuh ka por ki Pulit ki la register case bad pynlong ruh ïa ka jingtohkit kaba bniah katkum ki kyndon jong ka aiñ.
