10-11 tarik Nailar thmu ïaid Pilgrim biang ki Hindu ha Krem Mawjymbuiñ

Shillong, Nailar 02: Ka Dorbar Shnong Mawsynram da kawei ka sur ka la kyntait biang ïa ka jingpan jingbit jong ki riew ngeit Hindu ban pynlong ka jingïaid Pilgrim (Yatra) bad leit pynlong ka jinglehñiam ha Krem Mawjymbuiñ kaba dei kawei na ki jaka jngohkai pyrthei kaba pawnam kaba peit bad khmih da ka Shnong Mawsynram, East Khasi Hills District.
U Bah Hiamdor Rapsang Asst. Rangbah ka Shnong Mawsynram, ha ka jingïadonlang u Secretary bad ki dkhot EC, haba kren sha ki nongthoh khubor u la ïathuh ba na ka liang ki riewngeit Hindu lyngba u Manoj Sharma uba dei u Coordinator Yatra 2024, ki la pan jingbit biang na ka Dorbar Shnong ba kin pynlong ïa katei ka jinglehñiam hapoh Krem Mawjymbuiñ, hynrei na ka liang ka Dorbar Shnong ka kyntait ban ai jingbit.
“Kum ka Dorbar Shnong, kumba ngi la ïa rai ban ym ai jingbit ïa ki riewngeit Hindu ba kin pynlong ïa kata ka jinglehñiam hapoh Krem Mawjymbuiñ namar kam dei ka jaka ban lehniam hynrei kadei ka jaka jngohkai pyrthei. Ngi la phah ruh ka jingthoh sha ka ophis DC ba ngin ym ai jingbit,” ong u Bah Hiamdor.
U Bah Hiamdor u la ïathuh ruh ba watla ka Shnong kam ai jingbit hynrei kine (Hindu) ki thmu ban ïaid beit shakhmat ban pynlong ka jingïaid Pilgrim ka ban sdang naduh ka 10 tarik na Shillong haduh 11 tarik ha Krem Mawjymbuiñ.
“Ngi la ïohsngew ka khubor nangne nangtai ba wat hapdeng ka jingbym ai jingbit hynrei kine ki briew ki thmu beit shakhmat ban pynlong ïa ka jingwan lehñiam hapoh Krem Mawjymbuiñ. Hynrei na ka liang ka Shnong da lei lei ngin ym ailad,” u la ong.
U la ïathuh ruh ba ha u snem 2023 wat haba na ka liang ka Dorbar Shnong kam shym la ai jingbit bad kumjuh ruh ka ophis DC ka la bthah ba ki dei ban bud ïa ki kyndon ba la buh da ka Shnong, hynrei kim shym la bud satia.
“Ha u snem 2023 ha ka jingïakren bad u DC la ai jingbit ba kin wan tang kum ki riew shimet la ka long 10 ne 100 ngut ruh, hynrei kidei ban bud beit thik ïa ki kyndon ba kin wan beit kum ki nongjngohkai. Hynrei ngi lap ïa shibun ki kyndon ba ki la pynkheiñ da kaba theh dud ha u maw bad pynjaboh ïa ka sawdong sawkun. Te kumta mynta u snem lei ngin nang pynskhem ba da lei lei ngin ym ai jingbit bad ngim kwah ban pynlong ïa katei ka jaka kum ka jaka lehñiam”.
Shuh shuh u la ïathuh ruh ba ka jingpynlong ïa ka jingïaid Pilgrim bad lehñiam ha katei ka Krem ka la pynthut ïa kiwei pat kiba wan jngohkai pyrthei. Ka Dorbar Shnong ka la shim ruh ïa kane ka rai ban ym ai jingbit kadei ruh na ka jingpynsngew jong kiba bun balang ba kynthup naduh ki sengbhalang, ki riew paidbah bad kiwei kiwei.