1.4 metric ton pynmih ka Jylla Meghalya ïa u Soh Trun ha ka shi snem: Conrad Sangma
Sdang ka tamasa Soh Trun ha New Delhi
![](https://mawphor.com/wp-content/uploads/2023/08/Sohtrun-Conrad.jpg.jpg)
Shillong, Nailar 18 : U Myntri Rangbah ka Jylla u Conrad K Sangma u la ïathuh ba ka Jylla Meghalaya ka pynmih 1.4 lak metrik ton u Soh Trun ha ka shi snem. Ïa kane u Myntri Rangbah u la ong haba ai jingkren ha ka tamasa Sohtrun lane ka Meghalaya Pine Apple Fest-2023 kaba la sdang ha ka 28 tarik ha Dilli Haat, Ina, New Delhi.
Ïa kane ka tamasa la wan ban plie paidbah da u Giriraj J Singh uba dei u Union Minister jong ka tnad Rural Development and Panchayati Raj ka Sorkar India kum u kongsan bad u Myntri Rangbah ka Jylla Meghalaya u Conrad K Sangma kum u Symbud kongsan.
La ïadonlang ruh ka Myntri ka tnad Agriculture ka Meghalaya ka Kong Ampareen Lyngdoh, Bah Paul Lyngdoh Myntri ka tnad Tourism, Bah DP Wahlang Chief Secretary, ki ophisar, kiba la shah khot sngewbha haduh ki paidbah.
U Myntri Rangbah haba ai jingkren u la ong ba ka jingpynlong ïa ka tamasa Sohtrun ha New Delhi ka long kum ka lad ban nang pynïaid ïew ïa u sohtrun uba thiang ba ka Jylla ka pynmih. U la ong ruh ba ha ki khyndiat snem ba lah leit, ka sorkar ka pyni ïa ka jingkhlaiñ jong ka Jylla, ban pyni ïa ka khlaiñ ha kaba pynmih ïa ki jait mar rep, bad kane kadei ka sienjam kaba nyngkong ba ka sorkar ka buh thong ban kyntiew ïa ka rep ka riang. U la ong ba lyngba kane ka tamasa kan long ruh ka lad ban kyntiew ïa ki paidbah ka Jylla bad ïa ka riti dustur.
Shuh shuh u la ïathuh ruh ba ki nongrep kin ym lah ban pynïaid ïew sha kiwei pat ki jaka, hynrei lyngba kane ka tamasa, bad kiwei kiwei ki prokram ba ka sorkar ka la pynlong hapoh ka jylla, ki nongrep ki la lah ban pynïaid ïew.
U Gijiraj J Singh haba ai jingkren u la ai ka jingïaroh ïa ka Jylla Meghalaya kaba la pawnam ym tang ha kaba pynmih ïa u Sohtrun, hynrei ka pawnam ruh kaba kaba pynmih ïa u shynrai (Lakadong), ka roi ka par nalor kiwei kiwei. U la ong ruh ba lyngba kane ka tamasa, kan sa nang ïarap shuh shuh ïa ka Jylla Meghalaya ban pynïaid ïew ïa u sohtrun ym tang hapoh ka ri hynrei wat shabar ri ruh kumjuh.
U la ai ka jingïaroh ïa u Myntri Rangbah u Conrad K Sangma uba hapoh ka jingïalam jong u la lah ban pynpaw pyrthei ïa ka jingpynmih ïa u sohtrun.
Ïa kane ka tamasa Sohtrun kaba la tip kum ka Meghalaya Pine Apple Fest-2023, la pynïaid da ka tnad Agriculture and Farmers and Welfare, ka tnad Tourism jong ka sorkar Meghalaya ha ryngkat ka ophis resident Commissioner ka New Delhi bad Meghalaya Aid Ltd, kaban neh lai sngi ka la sdang mynta ka sngi Thohdieng ha Dilli Haat, Ina, New Delhi bad kan kut pat ha ka 20 tarik Nailar 2023.