Shillong, Nailar 14: Ka Hynñiewtrep National Liberation Council (HNLC) kaba la shah kheiñ beaiñ, ka la ong ba kan ym wan phai shuh sha ka jingïakren ïasuk lymda ka sorkar ka wanrah ka jingïapynbeit kaba don tynrai ha ka histori ba shisha bad ki jingangnud ka jaitbynriew.
Ha ka kyrwoh khubor ba la pynlait da General Secretary ka HNLC Bah Sainkupar Nongtraw ka la ong, “Ngi pynkynmaw ïa ka sorkar ba lada ka dang pyneh triang, ka bym don mon ban ithuh ïa ki jingshisha katkum ka histori bad ki jingangnud saiñ pyrthei jong ka jaidbynriew Hynñiewtrep, ngin ym wanphai shuh sha ka jingïakren ïasuk. Ka jingkut jingmut jong ngi ban ïada ïa ka long trai bad ka burom jong ngi ka long kaba ym lah ban pynkhih.”
Kumba pyndonburom ïa ki riewshlur ba kyllon ïap, ha ka jingrakhe ïa ka sngi kyntiew lama jong ka seng, ka HNLC ka pynpaw ïa ka jingsngewnguh ïa ki bahaïing hasem jong ki dkhot ba ehrang ka seng kiba la lenlade na ka bynta ka jingïaleh bad ïakhun.
U Bah Nongtraw u la ong, “Ha kane ka sngi, ka HNLC ka kynmaw burom ïa ki riewshlur ba kyllon ïap jong ka kynhun shipai Hynñiewtrep, kiba la aiti ïa la ka jong ka jingim na ka bynta ka jaitbynriew jong ngi. Ngi pynpaw ia ka jingsngewnguh kaba khraw ïa ki bahaïing ha sem jong ki riewshlur jong ngi, kiba ka jingaiti jong ki ka ai mynsiem ïa ngi ban pynbteng.”
U la pynpaw ruh ïa ka jingsngewnguh naduh ka mynsiem ïa baroh ki nongkyrshan jong ka HNLC, kynthup ïa ki riew paidbah bad ki kynhun sengbhalang ka bri u Hynñiewtrep, kaba ka jingïatylli jong ki ka pynkhlaiñ ïa ka jingïakhih ka seng.
Kum ka kyrwoh ka ong ba ka HNLC ka la rai ban bteng ïa ka jingïakhun ban ïoh ïa ka synshar khadar da ka jingkut jingmut kaba skhem, haba ban jur ba ka jingïakhun jong ka, kam dei tang ka jingïaleh hynrei ka dei ka lynnong kaba don jingmut ha ka histori jong ka jaidbynriew Hynñiewtrep.
