Yn ym slem shuh ban pyntrei ïa ka surok Intermediate Weloi – Mawkyrwat – Rangthong: Bah Prestone

Shillong, Rymphang 06: Ka Shnong Mawkyrwat, kawei na ki shnong kaba hap hapoh ka Hima Maharam Syiemship, South West Khasi Hills District ka la ïoh ban pynhap pyrda noh ïa ka jingrakhe lehkmen jong ka jingdap 100 snem jong ka, ha kaba u Bah Prestone Tynsong uba dei u Symbud Myntri Rangbah ka Jylla Meghalaya, ula long u kongsan.
Kum ka dak jong ka jinglehkmen, ka shnong Mawkyrwat ka la ïoh ruh ban plie paidbah ïa u dur mot jong u Myntri ba nyngkong eh jong ka Shnong Mawkyrwat u T.Bn. Rosaia Nongrem, ka jingpyllait ïa ka kot thup sah kynmaw ne Souvenir ba la pyllait da u Bah Prestone Tynsong, nangta ka jingpyllait ïa ka kot thoh ïa ka khana jong ka shnong ne ka History da u Bah Renikton Lyngdoh Tongkhar, MLA ka Mawkyrwat kum u Symbud Kongsan, bad bud sa ka jingpyllait ïa ka Website jong ka Shnong da u Bah Carness Sohshang uba dei u MDC barim jong ka Mawkyrwat.
U Bah Prestone Tynsong uba dei u Symbud Myntri Rangbah ka Jylla Meghalaya haba ai jingkren ha kane ka sngi ula pynpaw ka jingkhublei kyrpang ïa ka shnong Mawkyrwat ha kaba ka la kynjoh ïa u mawmer jong ka jingdap 100 snem bad ka dei kawei na ki shnong pdeng ha ki liang baroh bad kaba la pynmih shibun ki riewkhraw ha ki bynta bapher bapher. Kumta u la ai ka jingkyrkhu kyrdoh ïa ka shnong ba kan nang ïaid shaphrang ha kaba ai jingshakri ïa ki paidbah ha ki liang baroh, bad khamtam eh ha ka bha ka miat.
Ym tangkata, ha ka jingkren jong u ha kane ka sngi, ula ïathuh ruh ba ha kaba ïadei bad ki lynti ki synkien kiba bha hapoh kane ka South West Khasi Hills District na ka liang ka sorkar shen kan sa pyntrei noh ïa ka surok Intermediate kaba dei na Weloi – Mawkyrwat – Rangthong.
Shuh shuh u Bah Prestone Tynsong u la pynpaw ruh kum ka dak jong ka jingïadonbynta bad ïadonkti ha ka jingrakhe dap 100 snem jong ka Shnong Mawkyrwat ha kum kane ka sngi lehkmen, na ka liang ka sorkar ka wanrah ïa ka mang pisa kyrpang kaba T. 20 lak na ka Chief Minister’s Special Rural Development Fund (CMSRDF) ban shna pynbha ïa ka madan ïalehkai.
Nalor u kongsan, kiwei kiba ïadonlang ki long u Bah B. Mawlong, IAS, Deputy Commissioner ka South West Khasi Hills District, u Bah B. Jyrwa, MPS, Superintendent jong ki Pulit ka South West Khasi Hills District, u Bah R. R. Lyngkhoi, Myntri Shnong Mawkyrwat, bad kiwei kiwei ki riew Rangbah kiba la shah khot sngewbha.
Ki program kyrpang ha kane ka sngi ki long, ka jingrwai kyrpang na u Bah Shanbor Nongsiej bad ki samla, ka jingïaid pyni riam ki khynnah, ka jingshad, bad jingrwai ïa ka Anthem.