Yn ym pynkynriah ïa ka ophis NEEPCO na Shillong sha Guwahati, jubab u Symbud Myntri Rangbah

Shillong, Nailur 12 : U Symbud Myntri Rangbah ka jylla Bah Prestone Tynsong ha ka sngi Nyngkong u la ong ba kam don satia ka jingthmu ban pynkynriah noh ïa ka head office jong ka North Eastern Electric Power Corporation (NEEPCO) na Shillong sha Guwahati.
Ïa kane u la jubab halor ka jingkylli ba wanrah da u MLA ka AITC na Mawsynram, Bah HM Shangpliang ha ka Dorbar Synrai kaba long hynne ka sngi.
Haba rah ïa katei ka phang, utei u MLA u la ong ba katkum ka hukum kaba la pynmih ha ka 25tarik u Jylliew lai tylli ki ophis treikam kiba heh kynthup ïa ka ophis u Executive Director of Operation and Maintenance, Director of Contract and Procurement bad Director of Corporate Project Monitoring ryngkat bad ka shnat jong ka Information and Technology kumjuh ka Finance Wing, la pynkynriah noh na Shillong sha Guwahati.
Na ka liang u Bah Prestone haba jubab u la ïathuh ba ïa katei ka mat da lade hi u la ïakren bad ki bor ba dei peit hadien ba ki la ïoh i lyngba ki lad pathai khubor.
“Kadei da ka jingthoh ba ym don satia kaba kum kata kaban mih na ki bor bahalor la ka long na ka NEEPCO, ka jingong ba yn pynkynriah noh ïa ka ophis NEEPCO na Shillong sha Guwahati kam long satia kaba dei,” u la ong.
U Bah Prestone haba jubab shuh shuh ïa ka jingkylli, u la ong ba ka NEEPCO ka don ruh ïa ka tnad treikam kaba shipor ha Guwahati ban peit na ka bynta ka jingtreikam ki projek kiba don ha Arunachal Pradesh bad ruh ha kiwei ki jylla jong ka thain shatei lam-mihngi jong ka Ri.
Ha kane ka sngi, u MLA ka Mawsynram u la pan ruh ka jingkular na ka sorkar ba kan peit lem ïa ka bha ka miat jong ki trai shnong kiba trei ha ka NEEPCO namar ka don ka jingsyier hapdeng ki paidbah ba bun kin sa duh noh ïa ka kam jon gki lada ïa ka head office la rah noh sha Guwhati ha ki por ban wan.