Shillong, Nailur 26 : U Myntri Rangbah ka jylla Conrad K Sangma ha ka sngi Nyngkong u la ban biang ba ka jingkren ban pyndam ïa ka aiñ khalai ne ka Meghalaya Regulation of Gaming Act, 2021 kan ym mih shuh satia.
Haba pynpaw ïa kane ha ki lad pathai khubor, u Myntri Rangbah u la ong ba ka jingwanrah ïa katei ka aiñ kadei beit namar ki don lypa ki rynsan khalai kiba la treikam haduh mynta khlem laisen da kaba u ai nuksa ruh kum ki jaka khalai jackpot bad kiwei kiwei. “Kine donkam ban teh kyndon kampher la ngi sdang ne ngim sdang ïa kaba thymmai hynrei ïa kiba rim donkam ban teh kyndon,”u la ong.
Shuh shuh u la pynpaw ruh ba kitei ki kyndon kiba buh, ki dei kiba khang ïa ki trai shnong ba kin leit ban ïalehkai. Da kaba pynpaw ba ka sorkar ka la rai ban pynsangeh noh ïa ka Casino u Myntri Rangbah u la pyntip ruh ba ïa ka Meghalaya Regulation of Gaming Act, 2021 la dep ban mynjur da baroh 60 ngut ki nongmihkhmat ka jylla.
