Shillong, Iaiong 25 : U MP bad President ka MPCC u ma Vincent H Pala ha ka Lah Sngi U Blei u la pynpaw ba ka Congress kan ym ïateh paralok bad kino kino ki seng saiñ pyrthei shwa ka election MLA 2023 namar u ong ba kane kan sa nang pyntroiñ ïa ka party hapoh ka jylla.
“ Ha kaba ïadei bad kane ka jingïateh paralok bad ki seng saiñ pyrthei la ka dei shwa ka election ne hadien ka election ruh, ngi kum ki nongïalam ngin hap ban ïakren bad ïamir jingmut shwa bad ki nongïalam ka AICC. Hynrei na nga hi shimet ngam kwah ban ïatrei lang bad kano kano ruh ka seng saiñ pyrthei. Ngi la ïamir jingmut bad u Vice President bad kiwei ki nongïalam bad ki ruh ki pynpaw da kajuh ka sur ban ym ïatrei lang bad no bad no ruh hynrei ban ïaid beit marwei ha kane ka election 2023 namar ka Congress kan pynïakhun na baroh 60 tylli ki constituency” ong u ma Pala.
Halor ka jingong jong u Dr Mukul Sangma ba ka Congress ruh ka dei ka bynta jong ka sorkar MDA, u ma Pala u la ong “ U Dr Mukul u lah ban ong ïa kata namar haba ka kong Ampareen Lyngdoh bad ki 4 ngut ki MLA ki don bad ka Congress shwa ba kan shah pynhap kum ka nongïalam ka CLP bad sospon ïa baroh saw ngut ki MLA, namar ki lah ban leit pynïasoh sha ka sorkar MDA ha ka kyrteng jongka Congress hynrei haduh mynta ki dang shah sospon ha ka party”.
Kumta na ka liang ka Congress hi kam don kano kano ka jingïateh paralok ne ïatrei lang bad ka sorkar MDA ha kane ka jylla Meghalaya, ong u ma Pala. ïa ka rai halor kine ki san ngut ki MLA ruh shen yn sa shim rai da ka AICC Disciplinary Action Committee.
U la ïathuh ba ka Committee ka la dep ïakynduh shisien bad shen kan sa shong biang ban shim rai ym dei tang ha Meghalaya hynrei ïa kiwei kiwei ki jylla ruh. “Namar hadien ba ki khlem jubab ei ei ruh ngi la phah jingthoh sha ka AICC ba ka dei ban ai ka jingpynsaja ïa ki. Kumta hapoh shi taiew ne artaiew ka Committee ka la shim rai hi na ka bynta kine ki san ngut ki MLA.
